काठमाडौं । आयरल्यान्ड, नर्वे र स्पेनले प्यालेस्टाइनलाई स्वतन्त्र देशको मान्यता दिने घोषणा गरेका छन्।
यी तीन वटै देशले यही मे २८ तारिखदेखि लागू हुने गरी प्यालेस्टाइनलाई स्वतन्त्र देशको मान्यता दिने घोषणा गरेका बीबीसीले जनाएको छ ।
स्पेनले यो निर्णय इजरायलकोविरुद्धमा नभएको र हमासको पक्षमा नभएको उल्लेख गर्दै यो निर्णय शान्तिको पक्षमा भएको बताएको छ ।
प्यालेस्टाइन लिबरेशन अर्गनाईजेसन (पीएलओ) र इस्लामिक समूह हमासले युरोपेली राष्ट्रहरूले प्यालेस्टाइनलाई स्वतन्त्र राज्यका रूपमा दिएको मान्यताप्रति आभार प्रकट गर्दै निर्णयको स्वागत गरेका छन् ।
हमासले गएको अक्टोबर ७ तारिखमा इजरायलमाथि आक्रमण गरेपछि इजरायलले गाजामा कारबाही केन्द्रित गर्दा यस क्षेत्रमा अझै युद्ध चलिरहेको छ । आयरल्यान्ड, नर्वे र स्पेनले गाजा युद्धको सात महिनापछि प्यालेस्टिनी राज्यलाई औपचारिक मान्यता दिने घोषणा गरेका हुन् ।
हमासले यसलाई आफ्नो भूमिमा आफ्नो अधिकार पुष्टि गर्ने दिशामा एक महत्त्वपूर्ण कदम ठानेको छ । साथै हमासले विश्वभरका देशलाई आफ्नो वैध राष्ट्रिय अधिकारलाई मान्यता दिन विज्ञप्तिमार्फत आह्वान गरेको छ ।
यसैबीच प्यालेस्टाइनलाई देशको मान्यता दिने यो कदमको इजरायलले भने कडा विरोध गरेको छ । इजरायलले इजरायल, नर्वे र स्पेनका आफ्ना राजदूतलाई पनि फिर्ता बोलाएको छ ।
उक्त निर्णयले सो क्षेत्रमा थप अस्थिरता हुने इजरायलले चेतावनी दिएको छ।
