खिमराज चालिसे ।
भारतको हरियाणा अम्बालामा मूल प्रवाह अखिल भारत नेपाली एकता समाजको विस्तारित भेला सम्पन्न भएको छ ।
भारतव्यापी नगर सम्मेलन अभियानअन्तर्गत मे २१, २०२४ का दिन उक्त पाँचौँ भेला सम्पन्न भएको छ ।
केन्द्रीय सदस्य खिमराज चालिसेले करतल ध्वनिमाझ ब्यानर खोलेर भेलाको उद्घाटन गर्नुभएको थियो ।
सो अवसरमा मन्तव्य राख्दै उहाँले मूल प्रवाहले भारतमा नेपालीका सबै प्रकारका समस्यासँग सङ्घर्ष गर्दै न्याय दिलाउन अदालत जस्तै भूमिका निर्वाह गरेको दाबी गर्नुभयो ।
कार्यक्रममा आयोजक समितिका प्रस्ताव सुदूर पश्चिमोत्तर क्षेत्रीय समितिका सल्लाहकार लक्ष्मण अर्यालले प्रस्तुत गर्नुभएको थियो ।
भेलाले कमल सुवेदी, प्रेम रसाइली, धनबहादुर खडका, देवीराम शर्मा र लक्ष्मण अर्याल रहेको पाँच सदस्यीय मूल व्यवस्थापन समिति गठन गरेको छ ।
त्यसैगरी, भेलाले कमल सुवेदीको संयोजकत्वमा ३५ सदस्यीय प्रचार प्रसार समिति, प्रेम रसाइलीको संयोजकत्वमा पाँच सदस्यीय आर्थिक समिति, धनबहादुर खडकाको संयोजकत्वमा कलाकार व्यवस्थापन समिति, देवीराम शर्माको संयोजकत्वमा पाँच सदस्यीय स्वयम्सेवक समिति र लक्ष्मण अर्यालको संयोजकत्वमा मेस समिति पनि बनाएको छ ।
भेलालाई क्षेत्रीय समितिका लक्ष्मण अर्याल, महिला नगर संयोजक अन्जु सुवेदी, एरिया समितिका रामप्रसाद बस्याल, हाउसबाट रामबहादुर सुनारलगायतले शुभकामना दिनुभएको थियो ।
प्रेम रसाइलीको सञ्चालन तथा कमल सुवेदीको अध्यक्षतामा अघि बढेको उक्त कार्यक्रममा स्वागत मन्तव्य देवीराम शर्माले राख्नुभएको थियो ।
