काठमाडौं । नेकपा (मसाल) ले वर्तमान सत्ता गठबन्धन नेकपा (एमाले) का अध्यक्ष केपी ओलीको कुटिल रणनीति अन्तर्गत निर्माण भएको बताएको छ ।
प्रधानमन्त्री पुष्पकमल दाहाल प्रचण्ड ओलीको हातका कठपुतली भएको मसालको ठहर छ ।
महामन्त्री मोहनविक्रम सिंहले शनिबार (जेठ ५गते) एक वक्तव्य प्रकाशित गरी भन्नुभएको छ, ‘हामीले वर्तमान गठबन्धन सरकारको निर्माण हुने बेलामा नै भनेका थियौँ, प्रधानमन्त्री प्रचण्ड हावामा झुण्डिएका छन् । उनको कुनै आधार छैन । उनी वास्तवमा ओलीको हातका कठपुतली भएका छन् । व्यवहारले त्यो कुरा झन्झन् प्रष्ट हुँदै गइरहेको छ ।’
यस्तै, मसालले अहिले प्रचण्ड सरकार जसरी एमालेको हातमा कठपुतली बनेको छ, त्यो अवस्थामा उनले आफ्नो कुटिल रणनीतिलाई पूरा गर्न प्रयत्न गर्ने सम्भावना रहेको जनाएको छ ।
मसालले भनेको छ, ‘ओलीले प्रचण्डको नेतृत्वमा सरकारको गठनमा भूमिका खेलेको भएपनि उनको उद्देश्य यो सरकारलाई वा प्रचण्डलाई स्थायित्व दिने रहेको छैन । त्यस प्रकारको सरकारको गठनका पछाडि उनको बेग्लै कुटिल रणनीतिले काम गरेको कुरा बुझ्न गाह्रो पर्दैन । उनले पहिले पनि २/२ पल्ट संसदलाई विघटन गरेका थिए र संसदको चुनावमा जाने घोषणा गरेका थिए । आफ्नो त्यो नीतिलाई उनले अहिलेसम्म गलत बताएका छैनन् ।’
यस्तै, मसालले यदि नेपालमा एमालेले चुनावमा बहुमत प्राप्त गर्छ र त्यसको सरकार बन्छ भने ओलीको अधिनायकवादी चरित्रमाथि विचार गर्दा देश अधिनायकवादतिर जाने धेरै नै सम्भावना रहेको पनि औँल्याएको छ ।
प्रेस वक्तव्यको पूर्णपाठ यहाँ : अभियुक्तलाई बचाउन सत्तापक्ष नै लागेको उदाहरण नेपालको इतिहासमा पहिलो : मसाल
