काठमाडौँ । नेकपा (विप्लव पक्ष) का स्थायी समिति सदस्य अनिल शर्मा विरहीले देशमा प्रतिगमन हुन सक्ने सम्भावना व्यक्त गर्नुभएको छ ।
२०८० माघ २१ गते आइतबार जनपत्रकार सङ्गठन नेपालद्वारा आयोजित अन्तरक्रिया कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।
‘कतिपय मानिसहरू भनिरहेका छन्, प्रतिगमन हुनै सक्दैन’ उहाँले भन्नुभयो– ‘त्यस्तो होइन । फ्रान्समा पटक पटक प्रतिगमन भएको थियो । नेपालमा पनि हुन सक्छ ।’
उहाँले अगाडि भन्नुभयो– ‘भारतले नेपालमा राजतन्त्र ल्याउन मदत नै गर्ने छ । ज्ञानेन्द्रलाई भारतले समर्थन गर्ने, नेपाली सेना तटस्थ बस्ने, खुला सिमानाको फाइदा उठाएर एकडेढ लाख मानिसहरू सिंहदरबार उतार्ने हो भने के हुन्छ ?’
उहाँले प्रतिगमनलाई रोक्न समाजवाद साझा एजेन्डा बनाउनुपर्ने बताउनुभयो ।
‘वैज्ञानिक समाजवाद अहिल्यै आउँछ भनेको होइन, त्यसका लागि हाम्रो सङ्घर्ष जारी रहन्छ’ उहाँले भन्नुभयो– ‘समाजवाद नल्याउने हो भने या त ज्ञानेन्द्र, या जेलिन्सी जस्ता शक्ति अगाडि आउन सक्दछन् ।’
उहाँले प्रतिगमन भयो भने देश पछाडि फर्किन सक्ने भएकाले त्यसतर्फ सतर्क हुनुपर्ने बताउनुभयो ।
पूर्ण प्रेस स्वतन्त्रताको अनुभूति छैन : थापामगर
कार्यक्रममा मन्तव्य राख्दै प्रगतिशील पत्रकार सङ्घका महासचिव प्रकाश थापामगरले पूर्ण प्रेस स्वतन्त्रताको अनुभूति हुन नसकेको दाबी गर्नुभयो ।
‘संविधानमा पूर्ण प्रेस स्वतन्त्रता उल्लेख छ तर व्यवहारमा हामीले त्यस्तो अनुभूति गर्न सक्दैनौँ’ उहाँले भन्नुभयो– ‘जब कुनै असामाजिक तत्त्वले असामाजिक काम गर्न थाल्दछ, तब सबैभन्दा पहिला पत्रकारलाई ठेगान लगाउँछ ।’
उहाँले पत्रकारको सुरक्षाको स्थिति अझै पनि गम्भीर भएको बताउनुभयो ।
‘एउटा अपराधीले गल्ती गर्छ वा एउटा पत्रकारले समाचारसम्बन्धी गल्ती गर्छ’ उहाँले भन्नुभयो– ‘व्यवहारमा अपराधी र पत्रकारलाई उस्तै प्रकारको व्यवहार गरिन्छ ।’
उहाँले गणतान्त्रिक व्यवस्थामा पनि यस खालको स्थिति रहनु दुखद रहेको बताउनुभयो ।
कार्यक्रममा समाजवादी प्रेस सङ्गठनका अध्यक्ष विश्वमणि सुवेदी, प्रेस नेपालका महासचिव विदुर ढुङ्गेल, नेपाल प्रेस युनियनकी उपमहासचिव दिलिपाश्री अधिकारी र क्रान्तिकारी प्रेस सङ्गठनका संयोजक नारायण पङ्गेनीले पनि मन्तव्य राख्नुभएको थियो ।
जनपत्रकार सङ्गठनका अध्यक्ष शेरबहादुर विश्वकर्माको अध्यक्षता तथा महासचिव जानुका चौधरीको सञ्चालनमा अघि बढेको कार्यक्रममा सङ्गठनकै केन्द्रीय सदस्य पुष्पा साउदले अध्यक्ष विश्वकर्माको “नेपालको आमसञ्चार क्षेत्र : विद्यमान समस्या र अबको गन्तव्य” शीर्षकको आधारपत्र वाचन गर्नुभएको थियो ।
कार्यक्रममा अध्यक्ष विश्वकर्माले विषयवस्तु प्रस्तुत गर्दै स्वागतसमेत गर्नुभएको थियो ।
