दिनेश रैदास, दाङ ।
राष्ट्रिय जनमोर्चाका कार्यकारी अध्यक्ष रश्मिराज नेपालीले साम्राज्यवाद विश्वका लागि खतरा भएको बताउनुभएको छ ।
नेकपा (मसाल) दाङको आयोजनामा २०८० माघ ७ गते आइतबार आयोजित लेनिन शताब्दी स्मृतिदिवसको अवसरमा आयोजित अन्तरक्रियामा उहाँले यस्तो दाबी गर्नुभएको थियो ।
मन्तव्यको क्रममा उहाँले विश्व साम्राज्यवादका विरुद्ध सङ्घर्ष गर्नुपर्ने ठुलो जिम्मेवारी विश्वका श्रमजीवी जनताको काँधमा आएको बताउनुभयो ।
‘नेपालमा पनि एकातिर साम्राज्यवाद र अर्कातिर सामन्तवादका विरुद्ध सङ्घर्ष गर्नुपर्ने ठुलो उत्तरदायित्व हाम्रा अगाडि छ’ उहाँले भन्नुभयो– ‘त्यसको अर्थ हो– अहिले पनि हामी पुँजीवादी प्रजातान्त्रिक क्रान्ति अर्थात् नयाँ जनवादी क्रान्तिको अवस्थामा छौँ । त्यस क्रममा हामी राजतन्त्रलाई समाप्त पार्नका लागि सफल भएका छौँ ।’
सम्बोधनको क्रममा उहाँले राजावादी शक्तिहरू राजतन्त्र पुनस्र्थापना गर्ने अभियानमा रहेको बताउनुभयो ।
अहिले देशमा प्रतिगमनको खतरा यथावत रहेको बताउँदै उहाँले भन्नुभयो– ‘त्यो अवस्थामा प्रतिगमन विरुद्ध सङ्घर्षमा लगातार जोड दिनुपर्ने गम्भीर राष्ट्रिय उत्तरदायित्व हाम्रा अगाडि छ ।’
उहाँले ती ऐतिहासिक जिम्मेवारी पूरा गर्ने कार्य माक्र्सवादी–लेनिनवादी कम्युनिस्ट पार्टीले मात्र गर्ने बताउनुभयो ।
‘नेपालमा लेनिनवादी सङ्गठन प्रणालीमा आधारित कम्युनिस्ट पार्टीले नै त्यो जिम्मेवारी पूरा गर्न सक्छ । त्यसकारण त्यस प्रकारको पार्टीको निर्माण आजको हाम्रो केन्द्रीय वा प्रधान कार्य हुनुपर्छ’ उहाँको भनाइ थियो ।
कार्यक्रममा राजमो केन्द्रीय सदस्य तथा दाङ जिल्ला अध्यक्ष गणेश आचार्य, राजमो केन्द्रीय सदस्य रामजी चौधरी, भूमि आयोग दाङका अध्यक्ष लेखराज रेग्मी, नेकपा विप्लव पक्षका रुद्रबहादुर ओली, नेकपा (माओवादी केन्द्र) दाङका सचिव विश्वराज आचार्य, नेकपा (एमाले) दाङका सचिव मनोज बुढाथोकी, नेकपा (एकीकृत समाजवादी) का रामप्रसाद चौधरी, प्रजातान्त्रिक सेनानी पत्रकार सुशील गौतम र प्रगतिशिल पत्रकार सङ्घका रामप्रसाद जैसीलगायतले मन्तव्य राख्नुभएको थियो ।
कार्यक्रमको अध्यक्षता नेकपा (मसाल) जिल्ला समिति दाङका प्रवक्ता भरत भण्डारी गर्नुभएको थियो भने सञ्चालन शुक्रराज भण्डारीले गर्नुभएको थियो ।
