काठमाडौं । न्याय परिषदले विवादित तीन न्यायाधीशमाथि कारबाही प्रक्रिया अघि बढाएको छ । जिल्ला न्यायाधीशहरु राजकुमार कोइराला, अम्बिका निरौला र परशुराम भट्टराईमाथि न्याय परिषदले कारबाही प्रक्रिया अघि बढाएको हो ।

न्याय परिषद्को आइतबार बसेको बैठकले सर्वोच्च अदालतका न्यायाधीश डा. आनन्दमोहन भट्टराईको नेतृत्वमा तीन सदस्यीय जाँचबुझ समिति गठन गरेको हो । समितिमा सर्वोच्च अदालतकै न्यायाधीशद्वय प्रकाशकुमार ढुंगाना र तिलप्रसाद श्रेष्ठ सदस्य छन्।

जाँचबुझ समितिलाई ३० दिनभित्र प्रतिवेदन दिन भनिएको छ। समितिलाई यसअघि भएका जाँचबुझ समितिको प्रतिवेदन अध्ययन गर्ने, आवश्यक परे थप प्रमाण बुझ्ने, बयान लिने र कारबाहीका लागि आवश्यक राय दिने गरी कार्यादेश दिइएको न्याय परिषद् स्रोतले जनाएको छ।

समितिले प्रतिवेदन दिएलगत्तै न्याय परिषद्ले कारबाहीसम्बन्धी निर्णय गर्नेछ।

यसअघि न्याय परिषद् सदस्यकै नेतृत्वमा गरिएको छानबिनले तीनैजना न्यायाधीशमा गम्भीर विचलन देखाएको थियो।