कपिलवस्तु । नेपाल–भारत सीमा सर्भे टोलीले नेपालीको जमीनमा पिल्लर गाड्ने गरी सीमा सर्भे गरेपछि कपिलवस्तुका स्थानीय चिन्तित बनेका छन् । भारतले नेपाली भूमि अतिक्रमण गरि सीमा छुट्याउन गरेको प्रयत्नलाईनै वैधानिकता दिनेगरी सीमा सर्भे टोलीले तयारी गरेको भन्दै स्थानीय चिन्तित बनेका हुन् । यदी अहिलेकै सर्भे अनुसार सीमा निर्धारण गरिए नेपालीको करिब ३ सय विघा जमिन भारत तर्फ पर्ने छ ।
कपिलवस्तुको पश्चिम दक्षीणमा रहेको कृष्णनगर नगरपालिकाको नरेनपुर गाउँ र बिजयनगर गाउँपालिकाको वडा नम्बर ७ को गेडुवाजोत र लालपुर गाउँको गरि ३ सय विघा जमिन भारत तर्फ पर्ने चिन्ताले स्थानियलाई सताएको छ ।
करिब ८ महिना पहिले भारतले एकतर्फी रुपमा सीमा पिल्लर गाड्न खोजेको थियो । त्यस विरुद्व स्थानीयले गरेको विरोधका कारण सो कार्य रोकिएको थियो । नेपाली पक्षले स्थानीयको जग्गाको लालपुर्जाको फोटोकपि लिएर गएका थिए । तर त्यस विषयमा कुनै जानकारी नआएपछि भारतले चाहेअनुसार सिमांकन हुने त होइन ? भनेर उनीहरु चिन्तित बनेका हुन् ।
स्थानीय प्रल्हाद चौधरीले नेपाल–भारत सीमा चरङगहवा नदीले छुट्याएको र नदीले धार परिवर्तन गर्दा सीमा पनि वर सर्ने गरेको बताउनु भयो । उहाँका अनुसार भारत तर्फ भने नदीको धार परिवर्तन हुनासाथ खयरका विरुवा रोपी नदीको धारलाई नेपाल तर्फ नै फर्काउने गरिएको छ ।
सो क्षेत्रमा भारत तर्फ बलरामपुर जिल्लाको परशुरामपुर, पिपरा, गिद्वहवा, बनगाउँ पर्दछन् । ति गाउँमा समेत नेपाली भूमी रहेको स्थानीयको दाबी छ ।
राष्ट्रिय जनमोर्चाले सञ्चालन गरेको संगठनात्मक अभियानका क्रममा अघिल्लो महिना स्थानीयले राजमोको टोलीलाई सीमा क्षेत्रको अवलोकन गराएका थिए । सीमाको अवलोकन गरेर फर्किए पछि राजमो नेता केर सिंह अदैले भारतीय पक्षले नेपाली भूमी अतिक्रमण गरेको र प्राकृतिक रुपमा पनि नदीको धार परिवर्तनले नेपाली भूमी भारत तर्फ पर्न गएको युगदर्शनलाई जानकारी दिनुभयो । उहाँले सीमा सर्भे टोलीलाई खबरदारी गरिने र सीमा अतिक्रमण विरुद्व राजमो स्थानीय जनतासँगै संघर्ष गर्ने पनि बताउनुभयो ।
नेपाल–भारत सीमा सर्भे टोलीले कञ्चनपुर जिल्लामा पनि भारतले गरेको सीमा अतिक्रमणलाई वैधानिकता दिने गरि सिमांकन गरेको विरोधमा स्थानीयले जंगे पिल्लर तोडेका थिए । त्यस क्षेत्रमा पनि राजमो सुदूरपश्चिम प्रदेशले अनुगमन गरि सरकारलाई खबरदारी गरेको थियो ।
यो पनि पढ्नुहोस्ः
नेपाली भूमिमा गाडिएका पिलर हटाउन माग गर्दै प्रधानमन्त्रीलाई ज्ञापन
सीमा सर्वे टोलीले राष्ट्रहित विपरित काम गर्योः मनोज भट्ट
