कञ्चनपुर । राष्ट्रिय जनमोर्चाका केन्द्रीय सदस्य एवं सुदूरपश्चिम इन्चार्ज मनोज भट्टले नेपाल भारत संयुक्त सीमा सर्वे टोलीले भारतीय हितमा काम गरेको आरोप लगाउनुभएको छ ।
मंगलबार कञ्चनपुरको दक्षिणी सीमा क्षेत्रमा नेपालको भूभाग मिचेर बनाइएका जंगे पिलर अवलोकन गर्दै नेता भट्टले नेपाली पक्षको कमजोरीका कारण भारतले गरेको अतिक्रमणलाई वैधानिकता दिने काम भइरहेको बताउनुभयो ।
सन् १९८१ मा नेपाल–भारत बिचको सिमालाई सिमांकन गर्न गठन भएको उच्चस्तरी प्राविधिक समितिले २६ वर्ष लगाएर सिमांकन गरेको र ९७ प्रतिशत काम टुंग्याएको दाबी गरिएको उहाँको भनाई थियो । बाँकी रहेको भनिएको ३ प्रतिशत सिमांकन राजनीतिक तहबाट टुंग्याउने सहमति भएपनि लामो समयसम्म टुंगिन नसकेको उहाँले बताउनुभयो ।
कञ्चनपुरको ब्रमदेव मण्डिदेखी कालापानी सम्म र नवलपरासीको सुस्तालगायतका क्षेत्रमा रहेको सीमा समस्यालाई राजनीतिक तहमा टुंगो लगाउने निर्णय अनुसार दुई देशबीच सीमा सर्वेको काम भइरहेको भट्टले बताउनुभयो।
‘सिमांकनका दौरान दुई पक्षले तयार पारेको स्ट्रिप नक्सा अनुसार कञ्चनपुरमा भैरहेको सीमा स्तम्भ गाड्ने कामले झन् नेपालको भूमि वैधानिक तवरबाट भारततिरमा गाभ्ने वा नेपाली भूमिमाथिको दाबी छोड्ने काम भएको छ’ उहाँले भन्नुभयो, ‘बेल्डाँडी गाउँपालिकाको वडा नम्बर ३ मा रहेको सीमा स्तम्भ नम्बर ३१, ३२ र ३३ का कारणले नेपाल तर्फको नहर भारततर्फ पार्ने काम भएको छ ।’
उहाँले स्थानीय विद्यालयका नाममा कायम भएको फिल्डबुक र लालपुर्जा भएको जग्गा र वागेश्वरी नरसर्रीको जग्गासमेत भारतिर पारिएको बताउनुभयो । यस्तै, बेलौरी नगरपालिकाको वडा नम्बर १० मा गाडिएको सीमा स्तम्भ, भीमदत्तनगरपालिका वडा नम्बर ९ को जिम्मुवा, पुनर्वास नगरपालिकाको केही वडाहरुमा पनि गलत प्रकारले सीमा स्तम्भ कायम गरिएका कारण नेपाली भूमि भारत तर्फ पार्न गएको बताउनुभयो । यी सबै कारणबाट सीमा समस्या ९७ प्रतिशत हल भएको भन्ने भनाई गलत सावित भएको भट्टको भनाई थियो ।
राजमोका केन्द्रीय सदस्य तथा सुदुरपश्चिम अध्यक्ष नन्दराज भट्ट, अखिल नेपाल किसान महासंघका केन्द्रीय नेता हरिकृष्ण पाण्डे, राजमो प्रदेश कोषाध्यक्ष केशव नाथ योगी, अखिल (छैठौं)का महासचिव महेश जोशी, अखिल नेपाल युवक संघका केन्द्रीय सचिव प्रशान्त थापा, तराई मधेसी जनवादी मोर्चाका महासचिव राजाराम चौधरी, ट्रेड युनियन महासंघ (अन्टुक) का नेता जनक कुवँर ,राजमो कञ्चनपुर जिल्ला सचिव अहिमान थापा, कैलाली सचिव जगत जोशी, बिद्यार्थीनेताहरू हेमराज भट्ट ,महेश भट,पुष्कर भट्ट, युवकनेताहरु अमिर कुवर, दशरथ सुवेदी, समता समताका नेता हर्क बिक, विद्यार्थी नेता गणेश नाथ योगी लगायतका टोलीले अनुगमन गरेको छ ।
