काठमाडौँ । दक्षिण कोरियासँग मौसमी कामदार पठाउने कुनै पनि सम्झौता नभएको श्रम, रोजगार तथा सामाजिक सुरक्षा मन्त्रालयले जनाएको छ ।
प्रवक्ता डण्डुराज घिमिरेको हस्ताक्षरसहितको मौसमी कामदार लैजाने प्रक्रिया सुरु भएको भन्दै नक्कली सूचना सामाजिक सञ्जालमा भेटिएपछि श्रम मन्त्रालयले मौसमी कामदार पठाउने सम्झौता कोरियासँग नभएको पुष्टि गरेको हो ।
नक्कली सूचनामा कार्तिक २२ सम्ममा १२ हजार नेपाली कामदार पठाउन कोरियासँग सम्झौता भएको उल्लेख छ ।
मन्त्रालयले सामाजिक सञ्जालमा प्रसारित नक्कली प्रेस विज्ञप्तिमा विश्वास गरी अनावश्यक भ्रममा नपर्न आग्रह गरेको छ ।
‘आधिकारिक निकायको अनुमतिबिना सामाजिक सञ्जालमा वैदेशिक रोजगारसम्बन्धी विषयमा प्रचारप्रसार गरी सर्वसाधारणमा भ्रम सिर्जना नगर्नसमेत सम्बन्धित सबैमा जानकारी गराउँछ ।
बिहीबार मन्त्रालयद्वारा जारी विज्ञप्तिमा उल्लेख छ,‘प्रचलित कानुनविपरीत भएको र हुने गतिविधिलाई नियन्त्रण गर्न मन्त्रालय सदैव क्रियाशील रहेको व्यहोरा अनुरोध गरेको छ ।
वैदेशिक रोजगारीको प्रक्रिया सुरु गर्नुपूर्व आधिकारिता यकिन गरेर मात्र वैदेशिक रोजगारीको प्रक्रिया थालनी गर्नुहुन मन्त्रालय सबैमा हार्दिक अनुरोध गर्दछ ।’
श्रम मन्त्रालयले ‘प्रवक्ता/सहसचिव डण्डुराज घिमिरेको हस्ताक्षरसहितको लेटरप्याडको दुरुपयोग गरी दुष्प्रचार गरी भ्रम सिर्जना गर्नेलाई अनुसन्धान तथा कारबाहीको प्रक्रिया’ सुरु गरिएको जानकारी दिएको छ ।
कोरियासँग रोजगार अनुमति प्रणाली (ईपीएस) मा नेपाली कामदार पठाउने सम्झौता मात्रै कार्यान्वयनमा छ ।
