काठमाडौं । बहराईनलाई १० विकेटले हराउँदै आईसीसी महिला टी–२० विश्वकप एसिया क्षेत्र छनोटमा नेपालले लगातार दोस्रो जित निकालेको छ ।
पहिलो खेलमा मलेसियालाई ५ रनले हराएको नेपालले दोस्रो खेलमा बहराइनमाथि १० विकेटको सहज जित निकालेको हो ।
बहराइनले दिएको ३२ रनको झिनो लक्ष्य नेपालले २.५ ओभरमा भेट्टायो ।
नेपालका लागि ओपनर सीता राना मगर र काजल कुवँरले ३२ रनको साझेदारी गरेपछी नेपालले सहज जित निकालेको हो। कविता १७ र सीता २ रनमा नटआउट रहे ।
त्यसअघि मलेसियाको क्वालालम्पुरस्थित वायोमास ओभलमा टस जितेर पहिले ब्याटिङ गरेको बहराईन १५.४ ओभरमा ३१ रनमा समेटियो ।
बहराइनलाई कम स्कोरका रोक्न इन्दु बर्मा एक्लैले तिन विकेट झारिन्। घातक बलिङ गरेकी इन्दुले ४ ओभरमा ५ रन दिएर ३ विकेट लिदाँ २ ओभर मेडन राखिन्। खुसी डंगोलले दुई विकेट लिईन्। कविता कुवँर, पुजा महतो, रुविना क्षत्री बेलवासेले समान एक विकेट आफ्नो नाममा गरे ।
कप्तान दिपीका रासंगिकाले बनाएको ११ रन नै बहराइनका लागि सर्वाधिक रह्यो। दिपीका इन्दु बर्माको बलमा बोल्ड आउट भईन् । अन्य ब्याटरले दोहोरो अंकको स्कोर छुन सकेनन् ।
ओपनर एच जी थरंगा ४ रनमा कविता कुवँरको बलमा बोल्ड आउट भईन्। रसिका रत्नमाली र प्रज्ञा जगदिशा गोल्डेन डगआउट भए । अविरा वारिस शुन्य र इशारा मधुवन्थी ५ रनमा रनआउट भए। पवित्र सेट्टी १ रनमा क्याच आउट भईन् ।
समूह ‘ए’ मा नेपालसँगै आयोजक मलेसिया, बहराइन, भुटान, कतार र यूएई छन्। समूह ‘बी’ मा चीन, हङकङ, कुवेत, थाइल्यान्ड र म्यानमार छन्।
समूह चरणको तेस्रो खेलमा आइतबार भुटानसँग खेल्नेछ। सोमबार कतार र समुह चरणको अन्तिम खेलमा बुधबार यूएईसँग खेल्ने तालिका छ ।
समूहका शीर्ष दुई टोलीले सेमिफाइनलमा स्थान बनाउनेछन्। सेमिफाइनल खेल भदौ २२ गते शुक्रबार हुनेछ। फाइनल खेल २३ गते शनिबार हुनेछ ।
फाइनलमा पुग्ने दुई टोलीले २०२४ मा हुने ग्लोबल क्वालिफायर खेल्नेछ ।
इन्दु प्लेयर अफ दि म्याच
नेपाली राष्ट्रिय टोलीकी उपकप्तान इन्दु बर्मा बहराइनविरुद्धको खेलमा प्लेयर अफ दि म्याच चुनीएकी छिन् ।
इन्दुले ४ ओभरमा २ मेडनसहित मात्र ५ रन खर्चेर ३ विकेट लिएकी थिईन्। किफायती बलिङ गरेकी इन्दुले खेलपछि इन्दुले भनिन्, आज मेरो दिन थियो, त्यसैले प्रर्दशन राम्रो भयो ।
