काठमाडौँ । अखिल (छैठौं) ले पूर्व केन्द्रीय सदस्य बबिता थापाप्रति श्रद्धाञ्जली व्यक्त गरेको छ ।
अध्यक्ष देवेन्द्र कुँवरले युनियनको तर्फबाट २०८० साउन १६ गते शोकवक्तव्य जारी गर्दै शोक व्यक्त गरिएको हो ।
स्मृतिशेष बबिता थापा अखिल (छैठौं) को सत्रौँ राष्ट्रिय सम्मेलनपछि केन्द्रीय सदस्य तथा अर्घाखाँची र बागमती प्रदेशमा समेत सङ्गठनमा काम गरेको स्मरण वक्तव्यमा गरिएको छ ।
बबिताको निधनबाट सङ्गठनले इमानदार, जुझारु र मिलनसार योद्धा गुमाएको बताउँदै अखिल (छैठौं) ले शोकसन्तप्त परिवारजनप्रति समवेदना प्रकट गरेको छ ।
यस्तो छ, शोकवक्तव्यको पूर्ण :
“अखिल (छैठौं) का पूर्व केन्द्रीय सदस्य बबिता थापाको ३८ वर्षको उमेरमा भएको असमायिक निधनले हाम्रो युनियन स्तब्ध भएको छ । यस दुखद घडीमा मृतक बबिता थापाप्रति हार्दिक श्रद्धाञ्जली प्रकट गर्दैै शोकसन्तप्त पारिवारजनमा गहिरो समवेदना प्रकट गर्दछौँ ।
उहाँले अखिल (छैठौं) को सत्रौँ राष्ट्रिय सम्मेलनपछि केन्द्रीय समितिको सदस्यमा रहेर वामपन्थी, प्रगतिशील तथा जनतान्त्रिक आन्दोलनमा नेतृत्वदायी भूमिका निर्वाह गर्नुभएको थियो । त्यसैगरी, उहाँले अर्घाखाँची जिल्ला समिति र बागमती प्रदेशमा समेत नेतृत्वमा रहेर विद्यार्थी आन्दोलनमा महत्त्वपूर्ण योगदान दिनुभएको थियो । उहाँ सङ्गठनले सञ्चालन गरेका विभिन्न अभियानमा समेत सक्रिय भूमिका निर्वाह गर्नुभएको थियो ।
उहाँका दुबै मृगौलाले काम नगरेपछि आठ वर्षअघि आफ्नो बुबाद्वारा मृगौला प्रत्यारोपण गर्नुभएको थियो । केही दिनदेखि बिमारी पर्नुभएकी थापाको टिचिङ अस्पतालमा उपचारकै क्रममा साउन १५ गते निधन भएको छ । उहाँले पछिल्लो समय “आफ्नो मृगौला आफै बचाऊँ” अभियान सञ्चालन गरेर देशका विभिन्न स्थानमा सचेतना अभियानसमेत सञ्चालन गर्नुभएको थियो ।
उहाँको निधनबाट हामीले एउटा इमानदार, जुझारु र मिलनसार योद्धा गुमाएको छौँ भने सङ्गठनलाई अपूरणीय क्षति भएको छ । अन्तमा हामीले पुन: उहाँप्रति हार्दिक श्रद्धाञ्जली प्रकट गर्दछौँ ।”
