टिकापुर । कैलालीको टिकापुरमा एमसीसी र सीमा अतिक्रमण विरुद्ध शुक्रबार विरोध सभा गरिएको छ । नेकपा (मसाल) सहित १० राजनीतिक दलले देशव्यापी आयोजना गरेको विरोध प्रदर्शन अन्तर्गत टिकापुरमा पनि सभा आयोजना गरिएको हो ।

विरोध सभालाई नेकपा(मसाल)का कैलाल प्रवक्ता मिलन शाहीले सम्बोध गर्दै सरकारलाई सडकको आवाज समयमै सुनेर सच्चिन चेतावनी दिनुभयो । उहाँले सीमा अतिक्रमण प्रति सरकार चुप लागेर बस्न नहुने भन्दै जनता जागेको बेला सरकारले पनि सबै उपाय अपनाएर अतिक्रमित भूमि फिर्ता लिन तत्काल पहल गर्नुपर्ने धारणा राख्नुभयो ।

रामकृष्ण रेग्मीको सञ्चालन तथा राष्ट्रिय जनमोर्चाका सुदूरपश्चिम प्रदेश समिति सदस्य तिलक परियारको अध्यक्षतामा भएको विरोध सभामा राजमो प्रतिनिधि खगेश्वर शर्मा, नेकपा (माओवादी केन्द्र) का केन्द्रीय उपाध्यक्ष रंगनाथ ढकाल, नेकपा (माले) का केन्द्रीय सदस्य परेक रावललगायत नेताहरुले सम्बोधन गर्नुभएको थियो ।