काठमाडौँ । युवा तथा खेलकुद मन्त्रालयले बिहीबार १४ जनालाई सम्मानित गरेको छ ।
राष्ट्रिय युवा प्रतिभा सम्मानबाट १० तथा युवा पत्रकारिता पुरस्कारबाट चार पत्रकार सम्मानित भएका हुन् ।
राष्ट्रिय युवा प्रतिभा सम्मान पाउनेमा कृषितर्फ हीराबहादुर घर्ती र चन्द्रप्रसाद बस्नेत, वातावरण संरक्षणतर्फ हिरुलाल डगौरा, युवा सशक्तीकरण र नेतृत्व विकासतर्फ भावना भट्ट र दिवाकर अर्याल, पर्यटन प्रवद्र्धन र समाज सेवातर्फ विविएल राइज फाउन्डेसन, पर्यटन प्रवद्र्धनतर्फ सिर्जना ओली, समाज सेवातर्फ शौरभ रिमाल, विज्ञान तथा प्रविधितर्फ दीपेन्द्र नेपाली तथा स्वास्थ्यतर्फ डा राम थापाक्षेत्री रहेका छन् । पुरस्कारको राशि जनही रु एक लाख रहेको छ ।
त्यसैगरी, सम्मानित हुने सञ्चारकर्मीमा विनोद घिमिरे (दाङ), मेनुका ढुङ्गाना (अछाम), प्रकाश सिंह (बाजुरा) र केशरबहादुर रोका (प्युठान) रहेका छन् । युवा पत्रकारिता पुरस्कारको राशि जनही रु ५० हजार रहेको छ ।
सम्मानित भएकालाई युवा तथा खेलकुद मन्त्री डिगबहादुर लिम्बुले सम्मानपत्र वितरण गर्नुभएको थियो ।
कार्यक्रममा युवा तथा खेलकुद मन्त्रालयका सचिव सूर्यप्रसाद गौतम, राष्ट्रिय युवा परिषद्का कार्यकारी उपाध्यक्ष सुरेन्द्र बस्नेत, नेपाल पत्रकार महासङ्घका सचिव पवन आचार्यलगायतको सहभागिता थियो ।
मन्त्रालयले हरेक वर्ष देशभरबाट पत्रकार तथा अन्य प्रतिभा छनोट गरेर सम्मान गर्दैआएको छ ।
