काठमाडौँ । आइसिसी विश्वकप क्रिकेट छनोट–२०२३ अन्तर्गत आज असार ३ गते भएको पहिलो खेलमा नेपालले जिम्बावेलाई जितका लागि २९१ रनको बलियो चुनौती दिएको छ ।
जिम्बावेको हरारे स्पोर्टस क्लबको मैदानमा टस हारेर पहिले ब्याटिङको निम्तो पाएको नेपालले निर्धारित ५० ओभरमा आठ विकेट गुमाउँदै २९० रनको योगफल बनायो ।
नेपालले खेलको सुरुआत राम्रो गर्यो । ओपनर ब्याटरद्वय कुशल भुर्तेल र आशिफ शेखले पहिलो विकटका लागि ३१ दशमलव ५ ओभरमा १७१ रनको कीर्तिमानी साझेदारी गरे ।
यसअघि गत फेबु्रअरीमा नामिबिया विरुद्धको खेलमा ज्ञानेन्द्र मल्ल र आसिफ शेखले दोस्रो विकेटका लागि १३९ रनको साझेदारी गरेका थिए ।
कुशलले सर्वाधिक १३ चौका र २ छक्काको मदतमा ९९ रन बनाए भने आसिफले ६६ रन बनाए ।
त्यसैगरी, कुशल मल्लले ४१ रन जोडे भने आरिफ शेखले १० रन र गुल्सन झाले १३ बनाए । दीपेन्द्रसिंह ऐरीले ६ रन र करण केसी २ रनमा अविजित रहे ।
बलिङतर्फ जिम्बावेका रिचार्ड नगर्भाले चार विकेट लिए भने विलिङ्टन मासाकाट्जाले दुई विकेट झारे ।
त्यस्तै ब्लेसिङ मुजवानी र टेन्डाई चताराले समान एक/एक विकेट लिए ।
