एमसीसी र सीमा अतिक्रमण विरुद्ध संघर्षरत १० राजनीतिक दलले नेकपा (क्रान्तिकारी माओवादी) निकट अखिल क्रान्तिकारीका विद्यार्थी नेताहरु गिरफ्तार गरिएकोमा कडा आपत्ति जनाएका छन् । मंगलबार बसेको १० दलको संयुक्त बैठकले एमसीसी र सीमा अतिक्रमण विरुद्ध आन्दोलनलाई निरन्तरता दिने निर्णय गर्दै विद्यार्थी गिरफ्तारीको विरोध गरेको हो ।
मंगलबार अखिल क्रान्तिकारीले एमसीसी र सीमा अतिक्रमण विरुद्ध काठमाडौंमा आयोजना गरेको विरोध प्रदर्शनमा हस्तक्षेप गरी प्रहरीले अध्यक्ष हरिकृष्ण गजुरेलसहित तीन विद्यार्थी नेतालाई गिरफ्तार गरेको छ । १० दलीय गठबन्धनले गिरफ्तार विद्यार्थी नेतालाई विनासर्त तत्काल रिहा गर्न माग गरेको छ।
बैठकमा एमसीसी र कालापानी समेतका भूभागलाई भारतीय नक्शामा सामेल गरेको विषयमा गम्भीरतापूर्वक छलफल गरी आगामी सङ्घर्षका कार्यक्रमहरू अगाडि बढाउनेबारे महत्वपूर्ण निर्णय भएको बैठक पछि जारी वक्तव्यमा जनाईएको छ ।
निर्धारित यही फागुन १५ गतेको अन्तक्रिया कार्यक्रमलाई निरन्तरता दिँदै १६ गते दबावमूलक जुलुशको मितिमा परिवर्तन गरी आगामी फागुन २२ गते माइतीघर मण्डलाबाट दिउँसो १२ बजे जुलुश शुरु गरी वानेश्वर संसद भवनसम्म जाने बैठकले निर्णय गरेको छ ।
बैठकमा ने.क.पा. (मसाल)का महामन्त्री मोहन विक्रम सिंह, ने.क.पा. (क्रान्तिकारी माओवादी)का महासचिव मोहन वैद्य ‘किरण’, ने.क.पा. (माले)का महासचिव सीपी मैनाली, राष्ट्रिय जनमोर्चाका अध्यक्ष चित्र बहादुर केसी, देशभक्त जनगणतान्त्रिक मोर्चा, नेपालका अध्यक्ष सीपी गजुरेल, ने.क.पा. राष्ट्रिय सम्मेलन आयोजक समितिका संयोजक ऋषि कट्टेल, ने.क. पा. (माओवादी केन्द्र)का महासचिव कर्णजीत बुढाथोकी, जन समाजवादी पार्टीका सुभाष काफ्ले, राष्ट्रिय जागरण परिषद, नेपालका संयोजक साध्य बहादुर भण्डारी र नेकपा संयुक्त, स्थायी समिति सदस्य मधु वि.सी.काे उपस्थिति रहेकाे थियाे ।
एमसीसी जलाउन खोज्दा प्रहरी हस्तक्षेप
