काठमाडौं । एमसीसीको प्रति जलाउन लाग्दा अखिल (क्रान्तिकारी) का विद्यार्थी नेताहरुलाई प्रहरीले गिरफ्तार गरेको छ । मोहन वैद्य नेतृत्वको नेकपा (क्रान्तिकारी माओवादी) निकट अखिल क्रान्तिकारीका तीन नेतालाई मंगलबार प्रहरीले गिरफ्तार गरेको हो ।
शान्तिवाटिकाबाट जुलुशसहित आरआर क्याम्पस अगाडि आएर एमसीसी प्रति जलाउन खोज्दा प्रहरीले हस्तक्षेप गरेको थियो । त्यसक्रममा केही विद्यार्थी घाइते भएका छन् ।
क्रान्तिकारीका अध्यक्ष हरिकृष्ण गजुरेल, केन्द्रीय सदस्यद्वय सुनिल वैद्य र जगत शाहीलाई प्रहरीले नियन्त्रणमा लिएको छ । अखिल (क्रान्तिकारी) ले एमसीसी र भारतीय हस्तक्षेप विरुद्ध पूर्व घोषित कार्यक्रम अनुसार विरोध प्रदर्शन गरेको हो । आरआर क्याम्पस अगाडि कोणसभा गरी एमसीसी प्रति जलाउन खोज्दा प्रहरीले लाठीचार्ज गरेको अध्यक्ष गजुरेलले बताउनुभयो ।
वैद्य नेतृत्वको माओवादीले एकल रुपमा र नेकपा (मसाल) लगायतका १० राजनीतिक दलसँग मिलेर एमसीसी र सीमा अतिक्रमण विरुद्ध प्रदर्शन गर्दै आएको छ ।
