काठमाडौं । काठमाडौं उपत्यकामा डलर साट्ने बहानामा ठगी गर्ने समूहका सक्रिय रहेको पाइएको छ । प्रहरीले सो गिरोहका तीन जना पक्राउ गरेपछि यस्तो तथ्य फेला परेको हो ।
पक्राउ पर्नेमा सिन्धुपाल्चोकको बाह्रबिसे नगरपालिका–३ धार्पा घर भइ हाल ललितपुरको टिकाथली बस्ने २९ वर्षीय सुकलाल पाईन, सोही स्थानका २५ वर्षीय ईनकुमार पाख्रिन र २२ वर्षीय सूर्यबहादुर पाईन रहेका छन्।
उनीहरुले विभिन्न व्यक्तिहरुलाई फोन सम्पर्क गरी सस्तो दरमा अमेरिकन डलर साटीदिन्छु भनि लोभ देखाई ललितपुर हरिसिद्धिबाट १८ लाख काठमाडौंको चोभारबाट १८ लाख र ललितपुर ईमाडोलबाट १० लाख रुपैयाँ ठगी गरेको प्रहरीले जनाएको छ।
काठमाडौं उपत्यका अपराध अनुसन्धान कार्यालयमा प्राप्त निवेदन र पीडितले दिएको हुलियाका आधारमा सो घटनाबारे अनुसन्धान गर्ने क्रममा उनीहरु पक्राउ परेका हुन्।
पक्राउ परेका व्यक्तिलाई थप अनुसन्धान तथा कारबाहीको लागि प्रहरी वृत सातदोबाटो पठाइएको र घटनामा संलग्न अन्य व्यक्तिहरुको खोजतलास र थप अनुसन्धान कार्य जारी रहेको अपराध अनुसन्धान कार्यालयले जनाएको छ।
पक्राउ परेका सुकलाल पाईनलाई प्रहरी वृत्त बौद्धबाट २०७६ भदौ १० गते डाँकाचोरी कसुरमा मुद्दा चलेको थियो।
