पुष्कर भट्ट, महेन्द्रनगर । एमसीसी सम्झौताको खारेजी र कालापानीबाट भारतीय सेना फिर्तासहित सीमा अतिक्रमणको विरुद्ध शनिबार (फागुन ३ गते) महेन्द्रनगरमा नौ दलले विरोध सभा गर्ने भएका छन् । राष्ट्रिय जनमोर्चाको जिल्ला कार्यालयबाट जुलुश सुरु गरि बजार परिक्रमापछि मदनचोकमा विरोध सभा गर्ने राजमोका जिल्ला अध्यक्ष रामबहादुर कार्कीले जानकारी दिनुभएको छ ।
अध्यक्ष कार्कीको अध्यक्षतामा शुक्रबार बसेको संयुक्त बैठकले विरोध सभा गर्ने निर्णय गरेको हो । बैठकमा देजमो नेपालका नेता विष्णु दमाई, नेकपा (माओवादी क्रान्तिकारी)का केन्द्रीय सदस्य हरि सुवेदी, नेकपा (मसाल), नेकपा (माले), नेकपा माओवादी केन्द्रका प्रतिनिधि सहितको उपस्थिती रहेको थियो ।
बैठकमा राजमो केन्द्रीय सदस्य मनोज भट्ट बामपन्थी नेता जनक कुँवर, तराइ मधेश जनवादी महासचिव राजाराम चौधरी, जातीय समता समाजका महासचिव गोविन्द विक, लगायतका नेताहरु उपस्थित थिए ।
शनिबार घोषित कार्यक्रम अनुसार नौ राजनीतिक दलले देशब्यापी रुपमा विरोध सभा गर्ने घोषणा गरेका छन् ।
