दाङ । राष्ट्रिय जनमोर्चाका कार्यकारी अध्यक्ष रश्मीराज नेपालीले २०४६ चैत्र २४ को जनआन्दोलनको महत्त्व अहिले पनि उत्तिकै रहेको बताउनु भएको छ ।
राष्ट्रिय जनमोर्चा जिल्ला समिति दाङकोे आयोजनामा शुक्रबार लमहीमा भएको जनआन्दोलन दिवसको कार्यक्रमलाई सम्बोधन गर्दै उहाँले सो कुरा बताउनु भएको हो ।
राजमोले चैत २४ को जनआन्दोलन दिवसका अवसरमा ‘प्रतिगमन विरुद्ध संघर्ष गरौं, गणतन्त्रको रक्षा गरौं, संघीयताको खारेज गरौं’ भन्ने नाराका साथ लमहीमा सभाको आयोजना गरेको हो ।
कार्यक्रमलाई सम्बोधन गर्दै नेपालीले भन्नुभयो, ‘अहिले पनि प्रतिगमनको खतरा छ । राष्ट्रियता कमजोर भएको छ । राजावादी र साम्राज्यवादीहरु देशलाई पछाडि धकेल्ने प्रयत्न गर्दैछन् । २०६२–०६३ को जनआन्दोलनका उपलब्धिका विरुद्ध आवाज उठिरहेका छन् । त्यसैले अहिले पनि जनआन्दोलनको महत्त्वमा कमि आएको छैन ।’
उहाँले अर्को प्रसङ्गमा सरकारमा बस्ने दल देश र जनताप्रति जिम्मेवार नबन्दा देशको अबस्था सँधै कमजोर हुने गरेको बताउनु भयो ।
राजमो जिल्ला अध्यक्ष तथा केन्द्रीय सदस्य गणेश आचार्यको अध्यक्षतामा भएको कार्यक्रममा अखिल नेपाल किसान महासंघका केन्द्रीय कोषाध्यक्ष प्रेम आचार्य, अखिल नेपाल जनजाति सम्मेलनका केन्द्रीय सदस्य दलबहादुर घर्ती, अखिल नेपाल ट्रेड युनियन महासंघ (अन्टुक) का जिल्ला अध्यक्ष हरि थापा, अखिल नेपाल युवक संघका जिल्ला उपाध्यक्ष लेखराज आचार्य, अखिल नेपाल शिक्षक संघका जिल्ला अध्यक्ष रुमाल बसेलले मन्तव्य राख्नु भएको थियो ।
जिल्ला सदस्य ठाकुर भण्डारीको स्वागत मन्तव्यबाट सुरु भएको कार्यक्रमको सञ्चालन जिल्ला सचिव वसन्त पौडेलले गर्नु भएको थियो ।
