कोहलपुर । राष्ट्रिय जनमोर्चा बाँकेले संघीयता खारेजीको माग गर्दै कोहलपुरमा विरोध सभा गरेको छ । कोहलपुरको न्युरोड चोकमा आयोजित बिरोध सभामा राष्ट्रिय जनमोर्चाका लुम्बिनी प्रदेश सल्लाहकार बासुदेव पोख्रेलले सम्बोधन गर्दै भारतीय षडयन्त्रको रूपमा नेपाललाई भारतमा गाभ्नको लागि संघीयता भित्रिएको बताउनुभयो ।
उहाँले ठूला दलहरूले नागरिकता नीति नै खुकुलो बनाएर नेपाललाई सिक्किमिकरण र फिजीकरणतर्फ धकेल्न थालेको बताउनु भएको थियोे । राजनीतिक, आर्थिक, भौगोलिक तथा सामाजिक कुनै पनि कारणले संघीयता नेपालमा आवश्यक नभएको उहाँको भनाई थियो । बरु देशको अर्थतन्त्र, सार्वभौमिकता र राष्ट्रियता खतरामा पर्ने निश्चित भएकोले राष्ट्रिय जनमोर्चाले खबरदारी गर्दै संघीयता खारेजीको लागि संघर्ष गरिरहेको बताउनुभयो । देशलाई भिरबाट खस्नबाट रोक्नका लागि राजमोको न्यायपूर्ण आन्दोलनमा साथ दिन जनसमुदाय समक्ष अनुरोध गर्नुभयो ।
विरोध सभालाई अखिल नेपाल युवक संघका अध्यक्ष कृष्णराज पाण्डेले सम्बोधन गर्दै नेपालका शासकहरु भारतीय र अमेरिकी शाम्राज्यवादका गोटी बनेको आरोप लगाउनुभयो । उहाँले एमसीसी तथा संघीयता खारेजीको आन्दोलनमा सरिक हुन युवा वर्ग तथा आम जनतालाई आह्वान गर्नुभयो ।
राजमो बाँकेका उपाध्यक्ष जगदीश ढकालले सञ्चालन गरेको सभामा अखिल नेपाल किसान महासंघ (अफ्पा) का महासचिव तुलसीराम सापकोटा, राजमो बाँकेका अध्यक्ष भिम प्रकाश देवकोटा, अनेमसंघकी वैकल्पिक केन्द्रीय सदस्य पूर्णकला भन्डारी, जातीय समता समाजका केन्द्रीय सदस्य मनबहादुर सुनार लगायत नेता तथा कार्यकर्ताहरुको उपस्थिति रहेकोे थियोे ।
