सुर्खेत । राष्ट्रिय जनमोर्चाका महासचिव जनकराज शर्माले राष्ट्रियता र सार्वभौमिकताको रक्षा गर्न राष्ट्रिय जनमोर्चालाई बलियो बनाउनुपर्ने बताउनुभएको छ ।
राजमोले देशब्यापी रुपमा सुरु गरेको एक महिने संगठन विस्तार अभियानको सुर्खेतमा सुरुवात गर्दै महासचिव शर्माले संगठन निर्माणसँगै राष्ट्रियता विरुद्ध भएका कार्यहरुको बारेमा जनतालाई जानकारी दिने उद्देश्यले एक महिने कार्यक्रमको सूरुवात गरेको बताउनुभयो ।
महासचिव शर्माले भन्नुभयो, ‘देशमा वैदेशिक हस्तक्षेप बढिरहेको छ । भ्रष्टाचार बढिरहेको छ । देशको भूमि माथि अतिक्रमण भइरहेको छ । राष्ट्रियता, सार्वभौमिकता र स्वधिनतामा अतिक्रमण भइरहेको छ । नेपाल माथि भएको अतिक्रमणका विरुद्धमा जनतालाई जानकारी दिने उद्देश्यले यो कार्यक्रमको आयोजना गरेका छौँ ।’
संगठन विस्तारको कार्यलाई समेत संँगसँगै लैजाने उद्देश्यका साथ जनताले प्राप्त गरेका अधिकारहरुको रक्षाका लागि हाम्रो अभियान महत्वपूर्ण छ, उहाँको भनाई थियो । एमसीसी राष्ट्रहित विरुद्ध भएकोले त्यसलाई भित्रिन नदिन देशव्यापी रुपमा जनतालाई जानकारी गराउनु राष्ट्रिय जनमोर्चाको कर्तव्य भएको शर्माले बताउनुभयो ।
यसैगरि राष्ट्रियताको विषयमा जनतालाई प्रशिक्षण दिने, कोणसभा गर्ने, देशमा भएको भ्रष्टाचारका विरुद्धमा जनमत तयार गर्ने अभियान संचालनको सूरुवात गरेको राष्ट्रिय जनमोर्चाका केन्द्रीय सदस्य रत्नविक्रम प्यासीको भनाई थियो ।
