गोपालप्रसाद भट्टराई, अर्घाखाँची ।
अखिल नेपाल महिला संघकी महासचिव सकुन्तला रानाले मुलुकमा व्यवस्था फेरिए पनि अवस्था नफेरिँदा महिलाको स्तर उठ्न नसकेको बताउनुभएको छ ।

केन्द्रदेखि तलसम्म स्वार्थको राजनीतिले महिलाको मात्र नभइ सबै नागरिकको अवस्था जस्ताको त्यस्तै रहेको उहाँको भनाई छ ।

१ सय १३ औँ अन्तर्राष्ट्रिय महिला दिवसको अवसरमा महिला संघ अर्घाखाँचीले सोमबार सन्धिखर्कमा आयोजना गरेको शुभकामना आदान–प्रदान कार्यक्रमलाई सम्बोधन गर्दै महासचिव रानाले यस्तो बताउनुभएको हो ।

महिला संघअर्घाखाँचीका अध्यक्ष समेत रहनुभएकी महासचिव रानाले सत्ताको लडाइँले जनता मारमा परिरहेको भन्दै लामो समय लडेर ल्याएको उपलब्धिको रक्षार्थ महिलाहरु सचेत र संगठित हुनुपर्नेमा जोड दिनुभयो ।

कार्यक्रममा बिशिष्ट अतिथी राष्ट्रिय जनमोर्चाका प्रदेश सल्लाहकार शेर बहादुर विसीले देशमा भैरहेको विकृत राजनीतिले जनता निराश बनेको बताउनुभयो । राष्ट्र र जनताको हितमा राजनीतिको विकल्प नभएको उल्लेख गर्दै नेता विसीले यसका निम्ति विचारको राजनीति गर्नुपर्ने र सिकाउनुपर्ने बताउनुभयो ।

राजमो जिल्ला सचिव बाबुराम पन्थीले महिलाहरुमा जागरुकताको कमिले महिला अधिकारको समेत पुरुषहरूले दुरुपयोग गरिरहेको भन्दै अधिकारको प्राप्ति र सदुपयोगविरुद्ध एकजुट हुन आग्रह गर्नुभयो।

राजनीति गर्नेहरूले देश र जनताको लागि नभई आफ्नो स्वार्थका लागि गर्ने गरेकाले आम नागरिकको जीवनमा परिवर्तन हुन नसकेको उहाँको भनाइ छ । सचिव पन्थीले राजमोले काङ्ग्रेससँग गरेको गठबन्धनको विषयलाई लिएर भ्रम सिर्जना गरिएको बताउनुभयो ।

राजमोले कुनै स्वार्थ लिन नभई गणतन्त्र जोगाउन राष्ट्रपति चुनावमा कांग्रेससँग सहकार्य गरेको उहाँको भनाइ छ । केपी ओलीले दुई–दुई पटक संसद विघटन गरि देशलाई उल्टो बाटो हिँडाउने दुस्साहस गरिरहेको बेला कांग्रेस गणतन्त्र जोगाउने कित्तामा उभिएकोले सहकार्य गरिएको सचिव पन्थीको भनाइ छ ।

महिला संघ सन्धिखर्क नगरसमिति अध्यक्ष तथा जिल्ला कोषाध्यक्ष मिना विसीको अध्यक्षता, तुलसा कुँवरको स्वागत मन्तव्य, उषा बस्नेतको स्वागत गीत र जिल्ला सचिव कल्पना पोख्रेलको सञ्चालनमा सम्पन्न कार्यक्रममा महिला संघ जिल्ला सदस्य तथा सन्धिखर्क नगरपालिकाको कार्यपालिका सदस्य लिला भुसालले मन्तव्य राख्दै महिला अधिकार प्राप्तिको निम्ति संगठित, सक्रिय र सचेत हुनुपर्नेमा जोड दिनुभयो ।

राजमो केन्द्रीय सदस्य यमलाल पोख्रेल, पत्रकार महासंघ अर्घाखाँची उपाध्यक्ष भगवता पाण्डेसहित महिला संघ अर्घाखाँचीमा आवद्ध महिलाहरुको सहभागितामा कार्यक्रम सम्पन्न भएको हो ।