डोटी । राष्ट्रिय जनमोर्चा डोटीले जिल्लाका नौ वटै स्थानीय तहमा संगठन निर्माण गर्ने गरी योजना अघि बढाएको छ । राजमो डोटीको भेलाले जिल्लास्तरमा जिल्ला परिचालन समिति र स्थानीय स्तरमा बेग्ला बेग्लै नेताहरुलाई जिम्मा दिएर फागुन महिनाभर संगठन निर्माण गर्ने तयारी गरेको हो ।
शनिबार केआईसिंह गाउँपालिकाको वायलमा सम्पन्न जिल्ला भेलाले सबै पालिकामा संगठन निर्माणको योजना तय गरेको राजमो डोटीका नेता एवं अखिल नेपाल युवक संघका केन्द्रीय सचिव प्रशान्त थापाले जानकारी दिनुभएको छ । भेलाले अध्यक्ष बेणिमाधब जोशीको संयोजकत्वमा छ सदस्यीय मूल परिचालन समिति गठन गरेको छ समितिमा रमेश अबस्थी, केशवनाथ योगी, प्रशान्त थापा र नरेश आले रहनुभएको छ ।
डोटीका केआईसिंह, जोरायल र बड्डिकेदार, बोगटान, पूवीचौकी, सायल र आदर्श गाउँपालिका तथा दिपायल सिलगढी र शिखर नगरपालिकामा संगठन निर्माण गर्न नेताहरुबीच जिम्मेवारी बाँडफाँड गरिएको छ ।
वरिष्ठ बामपन्थी नेता आरसी भट्टको आतिथ्यतामा सम्पन्न भेलाको अध्यक्षता राजमो डोटीका अध्यक्ष बेणिमाधव जोशीले गर्नुभएको थियो भने, सञ्चालन सचिव केशव नाथ योगी तथा स्वागत उपाध्यक्ष रमेश अबस्थीले गर्नुभएको थियो ।
कार्यक्रममा युवक संघका केन्द्रीय सचिव प्रशान्त थापा, जनजाति सम्मेलनका केन्द्रीय सदस्य नरेश आले, रक्तिम अभियानका तारा सिंह बलायर, अखिल (छैठौं) का जिल्ला अध्यक्ष हेमबिक्रम चन्द, महिला संघका जिल्ला अध्यक्ष लक्ष्मी भट्टराई, जातिय समता समाजका डवल तिरुवा, ट्रेड युनियन महासंघका खगेन्द्र जोशी लगायत नेताहरुको आतिथ्यता रहेको थियो ।
शनिबार नै वायलमा राजमो डोटीले एमसीसी विरुद्ध कोणसभा गरेको थियो । कार्यक्रमलाई बामपन्थी नेता आरसी भट्ट, राजमो जिल्ला अध्यक्ष बेणिमाधब जोशी र सचिव केशवनाथ योगीले सम्बोधन गर्नुभएको थियो भने सञ्चालन प्रशान्त थापाले गर्नुभएको थियो । कोणसभा अघि राजमोले निकालेको जुलुशले बजार परिक्रमा गरेको थियो ।
