काठमाडौं । विश्व क्यान्सर दिवसका अवसरमा काठमाडौंमा ‘१०८ महामृत्युंजय मन्त्रोच्चारण’ गरिएको छ ।
आरोग्यता र निर्भय प्राप्तिका लागि भन्दै यसखाले कार्यक्रम मनाइएको हो । कार्यक्रममा अवसरमा विभिन्न मन्त्र उच्चाहरणसहित योग तथा ध्यान गरिएको थियो ।
क्यान्सरबारे फरक प्रकारले सचेतना जगाउन यस्तो कार्यक्रम आयोजना गरिएको ‘नेपाल क्यान्सर सर्भाभर्स सोसाइटी’ की कोषाध्यक्ष बिनु केसीले जानकारी दिनुभयो ।
‘क्यान्सर रोग जो सुकैलाई पनि लाग्न सक्छ । तर, यससँग डराएर होइन हिम्मतका साथ संघर्ष गर्नुपर्छ । उपचार गरे क्यान्सर निको हुन्छ’ केसीले युगदर्शनसँग भन्नुभयो, ‘यिनै विषयमा फरक ढंगले जनचेतना जगाउन विश्व क्यान्सर दिवसका अवसरमा ‘१०८ महामृत्युंजय मन्त्रोच्चारण’ कार्यक्रम आयोजना गरिएको हो ।
क्यान्सर रोगलाई जितेर अहिले सामान्य जीवनयापन गरिरहनुभएकी बिनु केसी अहिले क्यान्सरबारे जनचेतना जगाउन सक्रिय हुनुहुन्छ ।
शनिबार (फेब्रअरी ४ का दिन) विश्वभर विविध कार्यक्रम गरी विश्व क्यान्सर दिवस मनाइएको छ ।
अध्यनहरुका अनुसार संसारभरिका क्यान्सरले गराउने मृत्युको कूल २२ प्रतिशत सुर्तिजन्य पदार्थ सेवनका कारणले हुने पाईन्छ । १० प्रतिशत भने धेरै खाना खाएर या पौष्टिक आहारको कमीका कारण, मदिरा सेवन र नियमित ब्यायामको कमीले हुने रोग र सक्रंमणका कारणले हुने देखिन्छ ।
बाँकी क्यान्सरका कारणहरुमा विकिरणहरु अनि अन्य संक्रमणहरु रहेका छन् । विकासोन्मुख देशहरुमा भने हेपाटाईटीस बि, सि अनि ह्यूमन प्यापीलोमा भाईरसहरुका कारणले पनि क्यान्सर भएको पाईन्छ । केही क्यान्सरहरुभने पुस्तैनीरुपमै जिनमा आउने हुन्छ, कूल क्यान्सरको ५ देखि १० प्रतिशतसम्म यस्ता पुस्तैनी रुपमा आउने आनुवांशिक क्यान्सर पर्दछन् ।
हरेकवर्ष लाखौं मानिसहरूको क्यान्सरका कारणले हुने मृत्यु कम गर्दै धेरैलाई जागरण अनि उपचारका माध्यमबाट जोगाउने हेतूले फेब्रुअरि ४ मा क्यान्सर दिवस मनाइन्छ ।
