काठमाडौं । राष्ट्रिय जनमोर्चाका अध्यक्ष चित्रबहादुर केसी यतिबेला बागलुङका गाउँ–गाउँमा भोट माग्न व्यस्त हुनुहुन्छ । ८२ वर्षीय केसी युवा जोशका साथ बागलुङका विकट गाउँबस्ती चाहारिरहनुभएको छ ।
सोमबार जैमिनी नगरपालिकाको जैदीमा चुनावी सभालाई सम्बोधन गर्नुअघि केसीले युगदर्शनसँग भन्नुभयो, ‘विकट ठाउँहरुमा एकसरो भेटघाट सकियो । अझै केही वडाहरु बाँकी छन् ।’
केसीले अहिले मतदाता खेती थन्क्याउन व्यस्त रहेकोले खेतबारीमै पुग्नुपर्ने अवस्था रहेको बताउनुभयो ।
‘अहिले खेतीपातीको समय छ । बरा जनता खेती नसिहारी पनि भएन । भाषण सुन्न आएर खेती कसले स्याहार्ने ?’ केसीले भन्नुभयो ।
जनताले तपाइँहरुबाट के अपेक्षा गरेका छन् त ? भन्ने युगदर्शनको प्रश्नमा केसीले भन्नुभयो, ‘जनताको अपेक्षा त असिमित छन् नी । नेपाली जनताको समस्या बाटोघाटो, स्वास्थ्य, शिक्षाका समस्या छन् । बेरोजगारीको समस्या छ । जनताका अपेक्षा असिमित छन् । जनताले यिनै कुरा सुनाउँछन् । सुनाउन पनि पर्यो । उनीहरुले नत्र कसलाई सुनाउने ? फेरि सबै समस्याको समाधान सांसदले गरिदिन्छन् भन्ने छ ।’
अध्यक्ष केसीले भोट माग्न आउनेहरुले झुठा आश्वासन दिने गरेकोले जनताले सबै कुरा सांसदले नै पुरा गरिदिन्छन् भन्ने परेको बताउनुभयो । तर, आफूले सांसदबाट सबै कुरा सम्भव हुँदैन भनेर सम्झाउने गरेको पनि स्पष्ट पार्नुभयो ।
‘भोट माग्न आउनेले जनतालाई झुठा आश्वासन दिने गरेका छन्’ केसीले भन्नुभयो, ‘मैले झुठा आश्वासन दिन्नँ । तपाइँहरुका सबै अपेक्षा सांसदले पुरा गर्न सक्दैनन् भन्ने गरेको छु ।’
यस्तै, उहाँले बागलुङको विकासका लागि आफूले सक्दो योगदान गरेको बताउनुभयो । अरुले सानो काम गरेपनि प्रचार गर्दै हिँड्ने गरेको भन्दै केसीले आफूले ‘गीत गाएर नहिँडेको’ बताउनुभयो । आउँदो कार्यकाल बागलुङको विकासका लागि सक्दो प्रयास गर्ने पनि उहाँले बताउनुभयो ।
विगतमा जनताले जिताएर पठाएका एमालेका प्रतिनिधिले संसद चल्न नदिएर संसदलाई बन्धक बनाएकोतर्फ ईंगित गर्दै फेरि भोट माग्न जनताको बिचमा आएकोप्रति पनि व्यंग्य गर्नुभयो ।
‘दुई दुई पटक संसद विघटन भयो । अदालतले संसद पुनर्स्थापना गरेपछि पनि त्यत्रो नौ नौ महिना संसद चल्न दिएनन्’ केसीले भन्नुभयो, ‘बागलुङका जनताले जिताएर पठा’का सांसद रोस्ट्रम अगाडि नाचेका हैनन् संसद चल्न नदिन ? फेरि भोट माग्न आएका छन् ।’
अध्यक्ष केसीले जनता निकै सचेत रहेका र सबै कुरा बुझ्ने क्षमता रहेको भन्दै देशभरका जनताप्रति आफूलाई अगाध विश्वास रहेको बताउनुभयो । बागलुङका जनताको प्रतिक्रियाबाट आफू उत्साहित रहेको केसीले सुनाउनुभयो । उहाँले गठबन्धनका उम्मेदवार अत्याधिक मतले विजयी हुने उहाँको विश्वास छ ।
अध्यक्ष केसी बागलुङ क्षेत्र नं १ बाट गठबन्धनको तर्फबाट प्रतिनिधि सभा सदस्यको उम्मेदवार हुनुहुन्छ । सो क्षेत्रमा एमालेले सूर्य पाठकलाई उम्मेदवार बनाएको छ ।
यस्तै, राप्रपाका लक्ष्मी प्रसाद सापकोटा, राष्ट्रिय स्वतन्त्र पार्टीका खिमानन्द कँडेल, कांग्रेस विपीबाट शिवलाल सापकोटा र स्वतन्त्र चन्द्रबहादुर क्षेत्री मैदानमा छन् ।
बागलुङको प्रतिनिधि सभा क्षेत्र नम्बर १ मा बागलुङ नगरपालिका, जैमिनी नगरपालिका, काठेखोला गाउँपालिका र बरेङ गाउँपालिका पर्छन् ।
गएको स्थानी निर्वाचनमा राष्ट्रिय जनमोर्चाले जैमिनी र बरेङमा प्रमुख पद जितेको थियो भने काठेखोलामा उपप्रमुख जितेको थियो ।
ती पालिकामा रहेका ३७ वडामध्ये २९ वडामा गठबन्धन विजयी बनेको थियो। गठबन्धनको पक्षमा ३१ हजार ६३७ र एमालेले २२ हजार ३७६ मत पाएको थियो।
जम्मा एक लाख ९६ हजार २९७ मतदाता रहेको बागलुङ जिल्लाको क्षेत्र नम्बर १ मा ९६ हजार ६६६ मतदाता रहेका छन् ।
प्रदेशसभातर्फ गठबन्धनबाट ‘क’ मा कांग्रेसका दीपेन्द्रबहादुर थापा र एमालेबाट हिराबहादुर खत्री तथा ‘ख’ मा गठबन्धनले कांग्रेसका डिल्लीराम सुवेदी र एमालेले नवराज पौडेललाई उम्मेदवार बनाएको छ।
प्रतिनिधिसभा क्षेत्र नम्बर २ मा माओवादी नेता देवेन्द्र पौडेल र एमालेकी मञ्जु शर्मा चालिसेबीच मुख्य प्रतिस्पर्धा हुँदैछ।
