दाङ । स्वास्थ्य तथा जनसङ्ख्या मन्त्रालयले दाङमा पठाएको १८ ओटा डायलायसिस मेसिन अझैसम्म जडान हुन सकेको छैन ।
राप्ती स्वास्थ्य विज्ञान प्रतिष्ठान घोराहीमा १० र राप्ती प्रादेशिक अस्पताल तुलसीपुरका लागि आठ मेसिन साउन १३ गते दाङ पुगिसके पनि जडानको काम अगाडि बढेको छैन ।
जडान गर्न प्राविधिक नआएको राप्ती प्रादेशिक अस्पताल तुलसीपुरका डायलायसिस प्रमुख लीना बडेलले बताउनुभयो । मेसिन आए पनि अन्य सामग्री नआएको उहाँको भनाइ थियो । रगत सफा गर्ने उपकरण आउनुपर्ने उहाँको भनाइ थियो ।
‘मेसिन त आए तर अन्य सामग्री आउनुपर्छ’ उहाँले भन्नुभयो– ‘प्राविधिक आउनुपर्छ, प्राविधिक नआउँदासम्म जडानको काम अघि बढ्दैन ।’
अहिले राप्ती प्रादेशिक अस्पतालमा पाँचओटा डायलायसिस मेसिन छन्, जसबाट २३ जनाले सेवा लिइरहेका छन् । थप आठ मेसिन जडान भएमा ६० जनासम्म बिरामीले सेवा पाउने उहाँले बताउनुभयो ।
त्यस्तै, राप्ती स्वास्थ्य विज्ञान प्रतिष्ठानमा पाँचओटा मेसिन छन् । पाँचओटा मेसिनबाट अहिलेसम्म २५ बिरामीले सेवा लिइरहेकामा १० मेसिन थपिएसँगै यस क्षेत्रका धेरै बिरामीले सेवा पाउने सूचना अधिकारी निशानदाजु भट्टराईले बताउनुभयो ।
उहाँका अनुसार अहिले दुई चरणमा मात्रै सेवा दिने गरिएको छ । अब भने चौबिसै घण्टा सेवा दिन सकिन्छ । अहिले करिब ४० बिरामी उपचारको प्रतिक्षामा छन् । उनीहरुलाई पनि सेवा दिन सकिन्छ । लमही रोटरी क्लबको पहलमा डायलायसिस सेन्टर सञ्चालनमा छ । त्यहाँ अहिले ३० बिरामीले सेवा लिइरहेका छन् । (रासस)
