काठमाडौं । विभिन्न दलका महिला सांसदहरुले प्रत्यक्ष निर्वाचनमा महिलालाई ५० प्रतिशत सिट छुट्यान माग गरेका छन् । सोमबार महिला सांसदहरुले संसदमा जरुरी सार्वजनिक महत्वको प्रस्ताव दर्ता गर्दै सो माग गरेका हुन् ।
प्रस्तावको समर्थकमा राष्ट्रिय जनमोर्चाका सांसद दुर्गा पौडेललगायत १२ जना सांसद छन् ।
प्रतिनिधि सभा सदस्य अमृता थापा मगर प्रस्तावक र लक्ष्मी परियार, लक्ष्मी कुमारी चौधरी, चन्दा चौधरी, रंगमति शाही, बिना बुढाथोकी, लीलादेवी सिटौला, दुर्गा पौडेल, रेखा शर्मा, यशोदा गुरूङ सुवेदी, रेनुका गुरूङ र प्रमिला राई समर्थक रहनुभएको छ ।
निर्वाचन सम्बन्धी कानुनलाई संविधानसम्मत बनाउन निर्देशन दिने सम्बन्धमा प्रतिनिधि सभामा जरूरी सार्वजनिक महत्त्वको प्रस्ताव दर्ता गरिएको सो प्रस्तावमा जनाइएको छ ।
‘नेपाली जनताले अग्रगामी परिवर्तनका लागि पटक पटक गरेका बलिदानीपूर्ण संर्घषबाट स्थापित गरेको समानुपातिक समावेसी सहभागिताको विषयलाई सम्बोधन गर्दै नेपालको संविधान (धारा ३८–४) मा राज्यका सबै निकायमा महिलालाई समानुपातिक समावेशी सिद्धान्तको आधारमा सहभागी हुने हक हुनेछ, भने व्यवस्था गरेको छ’ सो प्रस्तावमा भनिएको छ, ‘यस प्रावधानको आसय भनेको संघीय संसद र प्रदेशसभाको निर्वाचनको प्रयोजनका लागि तोकिएको मिश्रित निर्वाचन प्रणाली अन्तर्गत समानुपातिक निर्वाचन प्रणाली र पहिलो हुने निर्वाचित हुने निर्वाचन प्रणाली अन्तरगत दुवै प्रक्रियावाट महिला र पुरुषको समान सहभागिता हुनुपर्छ भन्ने नै हो ।’
सो जरुरी सार्वजनिक महत्वको प्रस्ताव दर्ता गर्नुको दुईवटा उद्देश्य उल्लेख छ। जसमा–
१) संघीय संसदको प्रतिनिधिसभा र प्रदेशसभाको पहिलो हुने निर्वाचन प्रणाली अन्तरगत उम्मेदवारी दिँदा प्रत्येक दलले जनसंख्याको आधारमा समानुपातिक समावेशी प्रतिनिधित्व वमोजिम महिला उम्मेदवारी दिनुपर्नेछ ।
२) स्थानीय तहको निर्वाचनमा प्रमुख अध्यक्ष, उपप्रमुख उपाध्यक्ष, वडाध्यक्ष, जिसस प्रमुख र उपप्रमुखमा हरेक दलले कम्तिमा पचास प्रतिशत महिला उम्मेदवारी दिनुपर्नेछ।
