पोखरा । “दक्षिण एसियामा प्राकृतिक र सांस्कृतिक सम्पदा” विषयक दुई दिवसीय अन्तर्राष्ट्रिय सम्मेलन पोखरामा सम्पन्न भएको छ ।

पोखरा विश्वविद्यालय मानविकी तथा सामाजिक शास्त्र सङ्काय एवं त्रिभुवन विश्वविद्यालय पृथ्वी नारायण क्याम्पस, पोखराद्वारा संयुक्त रूपमा आयोजित सम्मेलनमा प्रस्तुतीकरण र सामूहिक छलफल गरिएको थियो ।

दक्षिण एसियाली अध्ययनका विभिन्न पक्षका अन्तरविषयमा सहभागी विद्वान्ले प्रस्तुतीकरण र सामूहिक छलफलमा भाग लिनुभएको थियो । सम्मेलनमार्फत दक्षिण एसियाली अध्ययनसँग सम्बन्धित सङग्रहालय र स्मारक, आदिवासी, भाषा र साहित्य, पर्यटन, वातावरण र इकोक्रिटिकिज्म, सिनेमा, प्रदर्शन र दृश्यकलाका साथै न्यू मिडिया, सञ्चार र साइबर संस्कृतिलाई निचोडको रूपमा प्रस्तुत गर्दै प्रस्तुत विषयका अनुभव र अन्वेषणलाई एकत्रित गरी जर्नल प्रकाशित गरिने जनाइएको छ ।

सम्मेलनमा नेपाल, भारत, चीन, भुटान, बङ्गलादेश र इटालीका १५ ओटा विश्वविद्यालयबाट कुल ८६ प्राध्यापक, विद्वान, स्वयमुसेवक एवम् अनुसन्धानकर्ता सहभागी रहेका थिए । कुल ३५ ओटा कार्यपत्र प्रस्तुत गरिएको पोखरा विश्वविद्यालयका सूचना अधिकृत लोकप्रसाद ढकालले जानकारी दिनुभयो ।

त्रिवि कीर्तिपुरका अङ्ग्रेजी केन्द्रीय विभागका प्राडा अभि सुवेदी र सुदूर पश्चिम विश्वविद्यालयका उपकुलपति प्राडा अम्मराज जोशी प्रमुख वक्ताका रूपमा रहनुभएको सम्मेलन पाँचओटा सत्रमा चलेको थियो ।