काठमाडौँ । सहरी विकासमन्त्री एवम् नेकपा (एकीकृत समाजवादी) की नेतृ रामकुमारी झाँक्री पुरानो पार्टी एमालेलाई सम्झेर रोएकी छन् । २०७८ पुस १६ गते शुक्रबार गृहजिल्लाको एक कार्यक्रममा मन्त्री झाँक्रीले आँशु झारेकी हुन् ।
गुल्मीको सदरमुकाम तमघासमा नेकपा (एकीकृत समाजवादी) गुल्मीको पार्टी कार्यालय उद्घाटन कार्यक्रममा मन्त्री झाँक्री एमालेमा गरेको सङ्घर्ष सम्झँदै भावुक बनिन् ।
एकीकृत समाजवादी गुल्मीको पार्टी कार्यालयनजिकै एमाले पार्टी कार्यालयको पक्की घर छ । त्यो घर र एमालेमा सङ्घर्षका दिन सम्झेर उनले मन थाम्न सकिनन् ।
‘जिन्दगीका महत्त्वपूर्ण समय त्यही घर पार्टीमा योगदान गर्यौं, लाखौँ जनताको सारथि मात्रै होइन, बदल्ने महत्त्वपूर्ण अभियानता पनि बन्यौँ’ उनले भनिन्– ‘दुःखले निर्माण गरेको घरमा बस्न पाइएन ।’
मन्त्री झाँक्रीले एमालेले वर्तमान गठबन्धन टुटाउन लागेको भन्दै कुनै पनि हालतमा गठबन्धन नटुट्ने बताइन् । एमालेकै कारण देशको आवश्यकताको आधारमा गठबन्धन बनेकाले आगामी निर्वाचनसम्म गठबन्धन निरन्तर जाने उनको भनाइ थियो ।
एमाले अध्यक्ष ओलीले निर्वाचन नै नचाहेको भन्दै निर्वाचन भए एमाले पत्तासाप हुने झाँक्रीले जिकिर गरिन् ।
