काठमाडौं । मूल प्रवाह अखिल भारत नेपाली एकता समाजले विदेशमा रहेका नेपालीलाई आम निर्वाचनमा मतदानको व्यवस्था मिलाउन माग गरेको छ । वैदेशिक रोजगारीको शिलशिलामा विभिन्न देशमा रहेका नेपालीहरुलाई आफू कार्यरत रहेको स्थानबाटै स्वदेशमा हुने आम निर्वाचनमा मतदान गर्न पाउने व्यवस्था मिलाउन मूल प्रवाहले माग गरेको हो ।
मूल प्रवाहले लामो समयदेखि उठाउँदै आएको सो माग कार्यान्वयन गराउन दबाब दिने उद्देश्यले समाजका अध्यक्ष र महासचिव काठमाडौं आउनुभएको छ । मूल प्रवाह नेपाली एकता समाजका अध्यक्ष दुर्गा बहादुर केसी र महासचिव ठाकुर खनाल हाल काठमाडौंमै भेटघाटमा व्यस्त हुनुहुन्छ ।
नेताद्वयले प्रधानमन्त्री शेरबहादुर देउवासँग पनि भेटघाट गर्ने कार्यक्रम छ ।
हाल सत्तासिन चार दलसहित राष्ट्रिय जनमोर्चा सम्मिलित गठबन्धनले सरकारको न्यूनतम साझा कार्यक्रममा ‘विदेशमा रहेका नेपालीलाई पनि मतदानको अधिकार दिलाउन पहल गर्ने’ बुँदा समेटेका छन् । सो बुँदा कार्यान्वयन गर्नुपर्ने अध्यक्ष केसीले बताउनुभयो ।
‘रोजीरोटीका लागि करिब ७० लाख नेपाली देशबाहिर रहेको हाम्रो अनुमान छ । ती नेपालीहरु देशमा हुने आम निर्वाचनमा घोट हाल्न घर आउन सक्दैनन् । त्यसकार उनीहरुलाई आफू कार्यरत देशबाटै मतदानको व्यवस्था मिलाउनुपर्छ’ अध्यक्ष केसीले भन्नुभयो, ‘नेपालको प्रजातान्त्रिक आन्दोलनमा प्रवासी नेपालीको ठूलो भूमिका छ । तर, उनीहरु नै मतदानबाट बञ्चित हुनु परिरहेको छ ।’
यस सन्दर्भमा देशभित्र राष्ट्रिय जनमोर्चाले आवाज उठाइरहेको पनि अध्यक्ष केसीले बताउनुभयो । उहाँले सर्वोच्च अदालतले समेत विदेशस्थित नेपालीलाई मतदानको व्यवस्था मिलाउन आदेश दिइसकेको अवस्थामा आफूहरु सो विषय कार्यान्वयन गर्न प्रधानमन्त्रीसँग आग्रह गर्न लागेको जानकारी पनि दिनुभयो ।
यो पनि :सरकारको कार्यक्रममा विदेशस्थित नेपालीलाई मतदानको व्यवस्था समेटिनु सकारात्मक : केसी
