नेपालगञ्ज । नेपाली कांग्रेसको भातृ संगठन नेपाल तरुण दलले गरेको बन्दको कारण बाँकेको जनजीवन प्रभावित भएको छ । आफ्ना नेता–कार्यकर्तालाई प्रहरीले पक्राउ गरेको विरोधमा तरुण दलले शुक्रबार बन्द आह्वान गरेको हो ।
तरुण दलका नेपालगञ्ज नगरसभापति सन्दीपजंग शाह र कोहलपुरका डिएसपी हेमबहादुर शाहीबीचको विवाद जिल्ला बन्दसम्म आइपुगेको हो । प्रहरीले तरुण दलका नेता शाह हतियारसहित पक्राउ परेको दाबी गर्दै आएको छ भने तरुण दलले डीएसपी शाहीले खशी मागेको र दिन नमानेपछि फसााउन षडयन्त्र गरेको दाबी गर्दै आएको छ ।
यही कात्तिक १४ गते बाँकेको जानकी गाउँपालिका–६ गनापुरस्थित नमस्ते रिसोर्टबाट प्रहरीले तरुण दलको नेपालगञ्ज नगरसभापति शाहसहित राघव शाह, माधव नेपाली, जयबहादुर बुढा र प्रितम थापामगरलाई पक्राउ गरेको थियो ।
रिसोर्टको पूर्वतर्फ पार्किङ गरिराखेको बा १८ च ४२११ नम्बरको कारको बायाँतर्फको सिटमा फल्स बटम बनाएर लुकाएर राखेको अवस्थामा अटोमेटिक पेस्तोल एक थान र दुई राउन्ड गोली बरामद भएको दाबी प्रहरीको छ ।
तरुण दलसँगको विवादमा मुछिएका डीएसपी शाहीमाथि प्रहरी प्रधान कार्यालयले छानबिन थालेको छ । उनले खशी मागेको अडियोसमेत सार्वजनिक भएको थियो ।
