भदौ २२ गते एमसिसी विरुद्ध देशैभर राजमोको प्रदर्शन, कस्तो छ तयारी ?

फाइल फोटो

काठमाडौं । राष्ट्रिय जनमोर्चाले एमसिसी विरुद्ध यही भदौ २२ गते देशैभर प्रदर्शन गर्दैछ । सरकारले संसदबाट एमसीसी पास गर्ने योजना बनाएपछि राजमोले त्यस विरुद्ध प्रदर्शन गर्न लागेको हो ।

राजमोले एमसिसी विरुद्ध देशभर प्रदर्शन गर्न लागेको हो । कतिपय जिल्लामा हुने कार्यक्रमबारे केन्द्रीय कार्यालयलाई जानकारी प्राप्त भएको र अन्य जिल्लामा कार्यक्रमको रुपरेखा तयार भइरहेको राजमोले जनाएको छ । आज साँझसम्म सबै स्थानमा हुने कार्यक्रमबारे जानकारी प्राप्त हुने केन्द्रीय कार्यालयले जनाएको छ ।

काठमाडौंमा दिउँसो २ बजे रत्नपार्कस्थित शान्तिवाटिकामा प्रदर्शन गरिने राजमो केन्द्रीय कार्यालयले जनाएको छ । कार्यक्रमलाई नेकपा (मसाल) का केन्द्रीय प्रवक्ता रामप्रकाश पुरी, अखिल नेपाल महिला संघका अध्यक्ष मिना पुन, राष्ट्रिय जनमोर्चाका केन्द्रीय सदस्य लालबहादुर थापालगायत नेताहरुले सम्बोधन गर्नुहुनेछ ।

यस्तै, बागलुङका सबै स्थानीय तहमा कार्यक्रम गरिने राजमो गण्डकी प्रदेशका उपाध्यक्ष धर्म कुँवरले जानकारी दिनुभएको छ । बागलुङ बजारमा हुने कार्यक्रमलाई अध्यक्ष अमर थापा र उपाध्यक्ष कुँवरले सम्बोधन गर्ने कार्यक्रम छ । यता, प्युठानको खलंगामा हुने प्रदर्शनलाई राजमो नेताहरू बोमबहादुर खत्री, कृष्ण खड्का, जिल्ला समन्वय समितिका अध्यक्ष केशव आचार्यलगायत नेताहरूले सम्बोधन गर्नुहुनेछ ।

सुदूरपश्चिमको धनगढी र महेन्द्रनगरमा कार्यक्रम आयोजना गरिँदै छ । धनगढीस्थित पार्कमोडमा दिउँसो २ बजे आयोजना हुने विरोध प्रदर्शनलाई राजमो कैलालीका अध्यक्ष दयाराम सञ्ज्याल, सचिव जगत जोशी, जनजाती नेता खडक रानाथारु, विद्यार्थी नेता डबल बोगटी लगायत नेताहरूले सम्बोधन गर्ने राजमो केन्द्रीय सदस्य नन्दराज भट्टले जानकारी दिनुभयो । यता कञ्चनपुरको महेन्द्रनगरस्थित मदनचोकमा प्रदर्शन गर्न लागिएको राजमो कञ्चनपुरका अध्यक्ष रामबहादुर कार्कीले बताउनुभयो ।

यसैगरी सुर्खेतमा हुने हुने प्रदर्शनलाई राजमो उपाध्यक्ष जनकराज शर्माले सम्बोधन गर्ने कार्यक्रम छ । दाङको घोराहीस्थित सहिदगेटमा दिउँसो ३ बजे कार्यक्रम आयोजना गरिएको जिल्ला अध्यक्ष गणेश आचार्यले जानकारी दिनुभयो ।

पूर्वी नेपालमा आयोजना हुने विरोध प्रदर्शनका क्रममा बारामा राजमो केन्द्रीय सदस्य धर्मानन्द सुवेदी, पर्सामा नेत्र पौडेल, रौतहटमा जिल्ला अध्यक्ष हरिकिशोर महतो, सिरहामा काजिलाल वाइवा, सर्लाही नवराज पौडेल, सुनसरीमा अमृत पाण्डे र योगेन्द्र ढकाल, उदयपुरमा लिलकुमार राई, संशुवासभामा हेमकुमार गुरुङ र लिलाबहादुर खत्री, लगायत नेताहरुले सम्बोधन गर्ने कार्यक्रम छ ।

यता, कपिलवस्तुको तौलिहवामा आयोजित सभामा राजमो जिल्ला अध्यक्ष दधिराम आचार्य र किसान संघका केन्द्रीय उपाध्यक्ष शिव पौडेललले सम्बोधन गर्नुहुने छ भने विजयनगरमा आयोजना हुने सभामा मजदुर नेता केरसिंह अदैले सम्बोधन गर्ने कार्यक्रम छ ।

यस्तै, पोखराको पृथ्वीचोकमा आयोजना हुने सभालाई राजमो गण्डकी प्रदेश अध्यक्ष शंकर बराल, नेकपा (मसाल) कास्कीका प्रवक्ता चन्द्रबहादुर केसीलगायत नेताहरुले सम्बोधन गर्नुहुने छ ।

रुपन्देहीमा संयुक्त सभा
यस्तै, रुपन्देहीमा नेकपा (मसाल) सहित विभिन्न राजनीतिक दलहरूले एमसिसी विरुद्ध संयुक्त सभाको आयोजना गर्दैछन् । दिउँसो २ बजे ट्राफिकचोकमा आयोजना हुने सभालाई राष्ट्रिय जनमोर्चाका अध्यक्ष चित्रबहादुर केसीले सम्बोधन गर्ने कार्यक्रम छ ।

भदौ २१ गते राष्ट्रिय जनमोर्चाका टानबहादुर खत्री, देशभक्त जनगणतान्त्रिक मोर्चाका विनोद मरासिनी, नेपाल कम्युनिस्ट पार्टीका खोमा तरामु मगर, नेकपा (माले) का रघुनाथ अर्याल, वैज्ञानिकक समाजवादी कम्युनिस्ट पार्टीका डोलराज विश्वकर्मा, विवेकशील साझा पार्टीका केशवराज खनाल, राष्ट्रिय स्वाधीनताका लागि नागरिक मञ्चका पदम कार्की र राष्ट्रिय जागरण परिषद्का चित्रबहादुर थापाले हस्ताक्षर गरी उक्त कार्यक्रमलाई सफल पार्न आग्रह गरेका छन् ।