काठमाडौं । अफगानिस्ताबाट बुधबार साँझसम्म २८८ जना नेपाली फर्किएका छन् । विभिन्न राष्ट्रहरूको प्रयास र समन्वयमा त्यहाँ रहेका नेपालीलाई उद्धार गरेर हालसम्म २८८ जनालाई स्वेदश फर्काएको परराष्ट्र मन्त्रालयले जनाएको छ ।
मन्त्रालयका अनुसार भदौ १ गते विहान ११८ जना र राति ८४ जना तथा आज २ गते विहान ६१ जना र अपरान्ह २५ जना समेत गरी हालसम्म कूल २८८ जना नेपाली नागरिकहरू काठमाडौं आएका छ्न ।
उनीहरूलाई सामाखुसीस्थित नेपाल सरकारले व्यवस्थापन गरेको होल्डिङ सेन्टरमा स्वास्थ्य मापदण्ड अनुसार कोभिड १९ को परीक्षणलगायतका प्रक्रिया पूरा गरी आवश्यक व्यवस्थापन गरिएको छ। अफगानिस्तानबाट उद्धार भएका थप नेपाली नागरिकहरू नेपाल फर्कने प्रकृयामा रहेको मन्त्रालयले जनाएको छ ।
यस्तै, कन्सुलर सेवा विभागको वेब पोर्टलमा आज साँझ ५ बजेसम्म २९६ जना नेपालीहरुले आफ्नो विवरण दर्ता गरेका छन्। दर्ता भएकाहरू मध्ये १६ जना नेपाली नागरिकहरू उद्धार भई नेपाल आइसकेका छन् ।
मन्त्रालयले उपलब्ध गराएको वेब पोर्टलमा दर्ता हुन, भाइबर र ह्वाट्सएप सुविधा सहितको मोवाइल नम्वरहरु ९७७ ९७४९३२६४५८ (कन्सुलर सेवा विभाग), ९७७ ९७४९३२६४५९ (परराष्ट्र मन्त्रालय), ९७७ ९८४१ ७९२७७४ (परराष्ट्र मन्त्रालय) र ९१ ८९२९६०१९२५ (नेपाली राजदूतावास, नयाँ दिल्ली) प्रयोग गरी विवरण टिपाउन पुनः अनुरोध गरेको छ ।
यस्तै, अफगानिस्तानमा उद्धारको पर्खाईमा रहेका नेपालीहरूले काबुलमा रहेका सुरेश चन्द्र शर्मा भाइबार र ह्वाट्सएप सुविधा सहितको मोवाईल नं. ९३७८७८४५९९४० लाई सम्पर्क गरी आफ्नो विवरण उपलब्ध गराउन सक्नेछन् ।
