काठमाडौँ । संसारभरि कोभिड खोप वितरण गरिरहेको अमेरिकामा दैनिक सङ्क्रमित सङ्ख्या लाखभन्दा माथि पुगिरहेको छ ।
गैरसरकारी अनुसन्धानकर्ताहरूको वेबसाइट वल्र्डोमिटर्सका अनुसार त्यहाँ अगस्त ४, २०२१ का दिन एक लाख १२ हजार २७९ जना सङ्क्रमित देखिएका थिए । त्यस्तै, अगस्त ३ का दिन त्यहाँ एक लाख आठ हजार ८२४ जना सङ्क्रमित देखिएका थिए ।
अमेरिकामा हालसम्म तीन करोड ६१ लाख ७६ हजार ४७१ जना कुल सङ्क्रमित पुगेका छन् । हालसम्म त्यहाँ छ लाख ३१ हजार २९९ जनाको मृत्यु भइसकेको छ । २ करोड ९७ लाख ८७ हजार ३१६ जना सङ्क्रमित निको भइसकेको अमेरिकामा अहिले सक्रिय सङ्क्रमितको सङ्ख्या ५७ लाख ५७ हजार ८५६ रहेको छ, त्यसमध्ये १२ हजार ७०५ जना गम्भीर प्रकारका बिरामी रहेका छन् ।
अमेरिकामा पछिल्लो समयमा कोभिड–१९ को सङ्क्रमण बढ्ने देखिएको छ । पछिल्ला केही समयमा सङ्क्रमण बढेपछि कतिपय राज्यमाा मास्क लगाउन अनिवार्य पनि गरिएको छ ।
आगामी चार हप्ता संक्रमण अझै बढ्ने
त्यसैगरी कतिपय अस्पतालमा कोभिड सङ्क्रमित बढेको समाचार पनि आइरहेका छन् । अमेरिकी संस्था सेन्टर फर डिजिज कन्ट्रोल एन्ड प्रिभेन्सनले आगामी चार हप्तामा अमेरिकामा कोभिडका सङ्क्रमित बढ्न सक्ने बताएको छ ।
सो संस्थाका अनुसार आगामी चार हप्तामा यहाँका अस्पतालमा भर्ना हुने दर बढ्ने तथा उपचारका लागि आएका व्यक्ति मृत्युदर पनि बढ्न सक्ने छ ।
सो संस्थाले अगस्त ४ का दिन विज्ञप्ति प्रकाशित गर्दै कोभिडको सङ्क्रमण अबका चार हप्तामा बढ्न सक्ने देखिएकाले यसको नियन्त्रणका लागि जनस्वास्थ्यका मापदण्ड अपनाउन सबै नागरिकमा अपिल पनि गरेको हो ।
आगामी चार हप्ता अर्थात् अगस्ट महिनाको २८ तारिखसम्ममा दुई हजार ३०० देखि बढीमा नौ हजारसम्म मृत्यु हुने सक्ने पनि विज्ञप्तिमा उल्लेख गरिएको छ । यी चार हप्तामा बढीमा २४ हजार जना जति सङ्क्रमित अस्पताल भर्ना गर्नुपर्ने अवस्था आउने पनि सो संस्थाले विज्ञप्तिमार्फत जनाएको छ ।
यसका साथै आगामी चार हप्तामा अमेरिकामा तीन लाख ५० हजारदेखि १८ लाखसम्म नै नयाँ सङ्क्रमित थपिन सक्ने पनि जानकारी दिइएको छ ।
