महेन्द्रनगर । महाकाली नदी तर्ने क्रममा भारतीय अर्धसैनिक बल एसएसबीले तुइन काटिदिँदा ब्याँस गाउँपालिका २ मालघाटमा एक जना नेपाली बेपत्ता भएका छन् । सदरमुकाम खलङ्गा आउने क्रममा माल खानदानका ३५ वर्षीय जयसिह धामी बेपत्ता भएका हुन् ।
शुक्रबार बिहान गाउँबाट दार्चुला सदरमुकाम आउने क्रममा उनी नदीमा तुइन तर्दै थिए । महाकाली तर्ने क्रममा एसएसबीले देखेपछि तुइन काटिदिएको स्थानीय विक्रसिह धामीले बताए ।
‘भारततर्फ पुग्ने बेला एसएसबीले एक्कासि तुइन काटिदियो’ उनले बताए– ‘नदीको बिच भागमा पुग्ने बेला तुइन काटिएपछि उनी बेपत्ता भएका हुन् ।’
‘पाँचछ जना स्थानीयहरू सामान लिन भारतको बाटो हुँदै दार्चुला आइरहेका थियौँ’ प्रत्यक्षदर्शी धामीले भने– ‘छ सात जना तुइनबाट भारत तरेका थिए, जयसिंह तर्ने बेला एसएसबी पुगेर तुइन काटिदिए ।’ भारत पाँगलमा रहेका एसएसबीले तुइन काटेका हुन् ।
धामी बेपत्ता भएपछि अहिले स्थानीय आक्रोशित छन् । नेपालतर्फ सडक नहुँदा ब्यास क्षेत्रका स्थानीयहरू दार्चुला सदरमुकाम खलङ्गा आउनका लागि भारतको बाटो भएर महाकाली नदीमा तुइन तरेर आउनुपर्ने बाध्यता छ । तुइनबाट खस्दा बेला बेला यस्ता घटना हुने गरेका छन्।
सरकारले तुइनमुक्त कार्यक्रमअन्तर्गत तुइन भएको ठाउँमा पुल बनाउन योजना सञ्चालन गरेको भए पनि कञ्चनपुरमा पुल निर्माण अलपत्र छ । व्यासका नागरिकहरू खाद्यान्न, औषधि र आवतजावत यही तुइनमार्फत गर्दै आएका छन् ।
पटक पटक एसएसबीले तुइन काटिदिने गरेको भए पनि स्थानीयले तुइन लगाउने गरेका छन् । अहिले घटनास्थलमा दुम्लिङ र सुनसेरा प्रहरीचौकीबाट प्रहरी र दुम्लिङबाट सशस्त्र गइरहेका छन् । बेपत्ताको खोजी भइरहेको जिल्ला प्रहरी कार्यालय दार्चुलाका सूचना अधिकारी नरेन्द्रबहादुर चन्दले बताए ।
