खुम रायमाझी, कुवेत ।
कुवेतमा एक हप्तामा तीन जना नेपालीको मृत्यु भएको छ । छुट्टाछुट्टै घटनामा लमजुङका अमिर तामाङ, धनकुटाकी सुमित्रा तामाङ र सिराहाका राजिउल्लाह मोहम्मदले ज्यान गुमाएका हुन् ।
लमजुङका अमिरको हृदयघातका कारण मृत्यु भएको हो । गत जुलाई १९ सोमबारका दिन अमिरको कोठामा सुतेकै अवस्थामा मृत्यु भएको थियो ।
यस्तै, धनकुटाकी सुमित्राले आत्महत्या गरेको जनाइएको छ । सुमित्राले २० तारिकमा साल्मिया भन्ने एरियामा आत्महत्या गरेकी हुन् ।
त्यसैगरी सिराहाका राजिउल्लाह मोहम्मदको दुर्घटनामा मृत्यु भएको पुष्टि भएको छ । गत आइतबार हार्डिस पिज्जामा बाइक ड्राइभरको रुपमा काम गर्दै आएका राजिउल्ला मोहमम्दको सवारी दुर्घटना मृत्यु भएको हो ।
लमजुङ जिल्लाबाट जारी भएको ०६९५३३३५ नम्बरको राहदानी वाहक २५ वर्षीय तामाङको १९ जुलाई २०२१ का दिन कोठामा सुतेकै अवस्थामा मृत्यु भएको हो । ५ वर्ष पहिले रोजगारीका सिलसिलामा कुवेत आएका तामाङले गत नोभेम्बर २०२० मा घर जान्छु भनी कम्पनीबाट पासपोर्ट लिएका थिए तर उनी घर नफर्की कम्पनीबाट भागि अवैधानिक रुपमा लुकीछिपी कुवेत बस्दै आएका थिए ।
सुमित्रा तामाङ (१०६६७३०१) अन्य बाटो हुँदै कुवेत आएको हुँदा पूर्ण विवरण प्राप्त हुन सकेको छैन । नेपाली दूतावास कुवेतका द्वितीय सचिव श्रीकृष्ण सिलवालले मृतकहरुको शवलाई नेपाल पठाउनका लागि कानूनी प्रकृयाका कामहरु अगाडि बढाइसकिएको हुँदा परिवारलाई सम्पर्कमा आउन अनुरोध गर्नुभएको छ ।
