लन्डन । बेलायतमा कार्यरत स्वास्थ्यकर्मीको सेवासुविधा वृद्धि गरिएको सरकारले बुधबार घोषणा गरेको छ । पछाडिको मिति राखेर गत अप्रिलदेखि नै लागु हुने गरी सरकारले सेवासुविधामा वृद्धि गरेको सरकारी अधिकारीहरूले जानकारी दिएका हुन् ।
राज्यको स्वतन्त्र निकाय राष्ट्रिय स्वास्थ्य सेवा (एनएचएस) ले स्वास्थ्यकर्मीको तलबमा तीन प्रतिशत वृद्धि गर्न सिफारिस गरेपछि सरकारले वृद्धि गरिदिएको हो ।
‘स्वास्थ्यकर्मीभित्र नर्स, पारामेडिसिन, कन्सल्टेन्ट, डेन्टिस्टलगायत पनि पर्ने छन्, उनीहरूले पनि तलववृद्धिको सुविधा पाउने भएका छन्’ सरकारी निकायद्धारा जारी वक्तव्यमा लेखिएको छ ।
बेलायतमा स्वास्थ्य क्षेत्रको सेवासुविधा, गुणस्तर, मापदण्ड आदि निर्धारण गर्न स्वतन्त्र निकायको रूपमा राष्ट्रिय स्वास्थ्य सेवा (एनएचएस) को व्यवस्था गरिएको छ ।
कोरोनाको महामारी विरुद्धको लडाइमा अग्रपङ्क्तिमा रहेर काम गरेकाले उनीहरूको सेवासुविधा वृद्धि आवश्यक भएको एनएचएसले निष्कर्ष निकालेको हो । (रासस/एएनआई)
