खुम रायमाझी, कुवेत ।
कुवेतस्थित ‘कुवेत रेड क्रेसेन्ट सोसाइटी (केआरसीएस)’ ले नेपाललाई कोरोना संक्रमणविरुद्ध लड्न विभिन्न स्वास्थ्य सामग्री सहयोग गरेको छ । नेपाली राजदूतावास कुवेतको समन्वयमा ती सामग्री नेपाल पठाइएको रेड क्रेसेन्टले जनाएको छ ।
केआरसीएसले कोभिड–१९ विरुद्ध आवश्यक प्रोटेवल अक्सिजन कन्सन्ट्रेटर, प्यासेन्ट मोनिटर, मेडिकल भेन्टिलेटर, हस्पिटल बेड विथ ओभरबेड टेबल, पल्स अक्सिमिटर, भाइटल साइन्स मोनिटर, पीपीईलगायतका स्वास्थ्य सामग्री तथा उपकरणहरू कुवेत–काठमाडौं सेक्टरमा सञ्चालित जजिरा एयरवेजको उडान मार्फत काठमाडौं पठाइएको हो । सो सामग्री काठमाडौंमा नेपाल सरकारलाई हस्तान्तरण गरिएको छ ।
नेपाली दूतावास कुवेतले कोरोना संक्रमणको अवस्थालाई मध्यनजर गरी अत्यावश्यक स्वास्थ्य सामग्री तथा उपकरण उपलब्ध गराएकोमा केआरसीएसप्रति आभार प्रकट गरेको छ ।
साथै, यस राजदूतावास तथा केआरसीएसको समन्वयमा मानवीय सहायता स्वरूप उपलब्ध गराइएका उक्त सामग्री तथा उपकरण सहज रूपमा कुवेतबाट काठमाडौंसम्म पुर्याउन सहयोग गरेकोमा जजिरा एयरवेज व्यवस्थापक एवं सञ्चालक प्रति पनि दूतावासले धन्यवाद व्यक्त गरेको छ ।
