काठमाडौं । स्वास्थ्य तथा जनसंख्या मन्त्रालय परिसरबाट स्कुटर चोरी भएको छ । पत्रकार रोशन दानीको बा ९१ प ९३७७ नम्बरको रातोकालो रंगको डिओ स्कुटर चोरी भएको हो ।
कामको सिलसिलामा मन्त्रालयमा पुगेका पत्रकार दानीको स्कुटर मन्त्रालयको पार्किङस्थलबाट गायव भएको हो । स्कुटरको डिकीभित्र डिएसएलआर क्यामेरा समेत रहेको पत्रकार दानीले बताउनुभएको छ ।
चोरी भएको स्कुटर ४ः२० बजेको समयमा मन्त्रालयको गेटबाट बाहिरिएको सीसीटिभी फुटेजमा देखिएको छ । फुटेजमा एक व्यक्तिले स्कुटर चलाएका छन् भने अर्का एक जना झोला बोकेर पछाडी बसेका छन् । मन्त्रालयको गेटबाट स्कुटर माइतीघरतर्फ मोडिएको फुटेजमा देखिन्छ।
स्कुटर चोरी भएकोबारे पत्रकार दानीले प्रहरीलाई खबर गरिसक्नुभएको छ । सो सम्बन्धमा प्रहरीले अनुसन्धान सुरु गरेको बताइएको छ ।
मन्त्रालय परिसरबाटै स्कुटर चोरी भएपछि त्यहाँको सुरक्षा अवस्थाबारे भने प्रश्नचिन्ह खडा भएको छ ।
