मेघराज रिष्मेली, बागलुङ ।।
गलकोट नगरपालिका वडा नं. ८ काँडेबास पचुवामा घाँस काट्न जाने क्रममा लडेर एक जनाको मुत्यु भएको छ ।
बुधबार ३३ वर्षीय अशोक कँडेलको घाँस काट्न जाने क्रममा मुत्यु भएको प्रहरीचौकी हटियाका प्रमुख बाबुराम पुरीले जानकारी दिनुभयो ।
कँडेल दिउँसो १२ बजे पचुवाकै कुभिन्डो भन्ने ठाँउमा घाँस काट्न भनेर जानुभएको तर अबेरसम्म घर नफर्किएको र फोनसमेत नउठेपछि परिवार र आफन्तजनले खोजी गर्दा साँझ साढे ६ बजे गल्कोट नगरपालिका वडा नं. ८ कै कुभिन्डो भन्ने ठाउँमा पानीको कुलोमा बेहोस अवस्थामा फेला परेका थिए । उपचारका लागि अस्पताल लैजाने क्रममा उनको निधन भएको बताइएकोे छ ।
कँडेलले घाँस काट्न जाँदा साथमा लगेको हँसिया र नाम्लोसमेत सोही ठाउँमा रहेकोले कँडेलको पानीको कुलोमा लडेर निधन भएको हुन सक्ने प्रहरीको अनुमान छ ।
कँडेलको शव पोस्टमार्टमका लागि अहिले प्राथमिक स्वास्थ्य केन्द्र बुर्तिवाङमा पठाइएको छ ।
