सुनवल । राष्ट्रिय जनमोर्चा नवलपरासीका नेता तिलक प्रसाद सुवेदीले बुवाको मृत्युपछि आफूले पराम्परागत काजक्रिया नगर्ने अडान लिएपछि बुवाको शवमा दागबत्ती दिनबाट बञ्चित गरिएको बताउनुभएको छ ।
नेता सुवेदीका बुवा सालिकराम सुवेदीको गत असार १७ गते निधन भएको थियो । उहाँप्रति श्रद्धाञ्जली अर्पण गर्न सोमबार आयोजित शोक सभामा राजमो नवलपरासीका सल्लाहकारसमेत रहेका सुवेदीले आफूले केस मुण्डन र परम्परागत काजक्रिया नगर्ने अडान लिएकै कारण बुवालाई दागबत्ती दिन नपाएको गुनासो गर्नुभयो ।
‘मलाई रुढीवादी परम्परागत किरियामा विश्वास लाग्दैन । त्यसैले मैले केस मुण्डन र कोरा बारेर किरिया नगर्ने अडान लिएँ’ सुवेदीले भन्नुभयो, ‘त्यसकारण शव दाहसंस्कार गर्दा मलाई दाजुभाइ र आफन्तले दागबत्ती दिनबाट समेत बन्चित गरे ।’
सालिकरामका जेठा छोरा रहेका सुवेदीले बुवा आमालाई जीवितै छँदा सेवा गर्नुपर्ने भन्दै मरेपछि दानपिण्ड र रुढीवादी काजकिरियाको कुनै अर्थ नहुने बताउनुभयो ।
कार्यक्रममा उपस्थित हुनुभएका राष्ट्रिय जनमोर्चाका अध्यक्ष चित्रबहादुर केसीले गलत संस्कृति र परम्पराविरुद्ध संघर्ष गर्नुपर्ने बताउँदै तिलक सुवेदीको व्यवहारले समाजलाई शिक्षा दिएको उल्लेख गर्नुभयो ।
उहाँले हाम्रो समाजमा जिउँदा बावु–आमालाई दुःख दिने, वृद्धाश्रममा छाड्ने तर मृत्युपछि पण्डितलाई दान गरेर मरेकाले पाउँछन् भन्ने गलत संस्कृति रहेको बताउनुभयो । यस्ता रुढीवादी परम्पराविरुद्ध संघर्ष गर्नुपर्नेमा केसीले जोड दिनुभयो । उहाँले यो संसारमा हरेक जिवको जन्म र मृत्यु अनिवार्य छ तर मृत्युपछि संस्कारमा यही गर्नु पर्छ भन्ने भन्दा पनि जे विज्ञान सम्मत छ त्यसलाई अंगिकार गरेर विज्ञान विरोधि कुरा छोड्दै जानुपर्छ भन्नुभयो ।
कार्यक्रममा राष्ट्रिय राजनीतिबारे पनि केसीले चर्चा गर्नुभयो । अध्यक्ष केसीलेले केपी ओली सरकार अदालतले संसद व्युँताय पनि आफू नै सत्ता कसरी टिकिरहन सकिन्छ भन्ने रणनीतिमा रहेकै कारण मुलुकमा अस्थिरता उत्पन्न भएको बताउँदै ओलीका गलत प्रवृतिलाई परास्त गर्न पाँच दलीय गठबन्धन बनेको बताउनु भयो ।
मृतक सालिकराम सुवेदीको जेष्ठ सुपुत्र तिलक प्रसाद सुवेदीको अध्यक्षता र नाति सागर सुवेदीको स्वागत मन्तव्यमा अघि बढेको कार्यक्रमलाई अखिल नेपाल शिक्षक संघ नवलपरासी जिल्ला अध्यक्ष डिल्लीराज ज्ञवालीले सञ्चालन गर्नुभएको थियो । मृतकको सम्झना एक मिनट मौन धारणपछि उहाँको तस्बिरमा माल्यार्पण गरिएको थियो । जेठा छोरा सुवेदीले आफ्ना बुवाको जीवनीबारे प्रकाश पार्नुभएको थियो ।
शोक सभामा राजमो केन्द्रीय सल्लाहकार बद्रे आलम, राजमो नेता सुरेश थापा, नेपाली कांग्रेस नवलपरासी जिल्ला सभापति बिष्णु पौडेल, नेकपा (माओवादी केन्द्र) का जिल्ला अध्यक्ष भविश्वर तिवारी, रक्तिम सास्कृतिक अभियानका केन्द्रीय अध्यक्ष रेम राना, वामपन्थी नेता कृष्णराज पौडेल, नेकपा (मसाल) जिल्ला प्रवक्ता धनपति सापकोटालगायतको सहभागिता रहेको थियोे ।
राजमो नवलपरासीद्वारा श्रद्धाञ्जली
