खिमराज चालिसे, चंडिगढ ।
मूलप्रवाह अखिल भारत नेपाली एकता समाजले एक नेपाली युवतीको पञ्जाबबाट उद्धार गरेको छ । पञ्जाबको डेराबसीमा नेपालबाट भगाएर ल्याइएकी ती यूवतीलाई उद्धार गरी एकता समाजले स्वदेशमा माइती तथा प्रसाशनको जिम्मा लगाएको छ ।
कञ्चनपुर जिल्लाको शुक्लाफाँटा नगरपालिकाकी २९ वर्षीया युवती (नाम गोप्य राखिएको छ) लाई स्थानीय बलदेव विष्टको कान्छो छोरा दानबहादुर विष्टले गत असार २० गते नेपालबाट भगाएर भारतको डेराबसीमा ल्याएका थिए ।
दानबहादुरले यसभन्दा पहिला पनि अन्य यूवतीहरू ल्याएको आरोपको आधारमा विषयको गम्भीरतालाई ध्यान दिँदै युवतीलाई उद्धार गरी स्वदेश पठाइएको हो ।
मूल प्रवाहका केन्द्रीय सदस्य दिनेश खडका, केन्द्रीय सल्लाहकार तिलक पौडयाल र नेपाली समाचारका संयोजक तथा युगदर्शन सम्वाददाता खिमराज चालिसेको विषेश सक्रियतामा तत्काल डेराबसी कुडावाला गाउँमा पुगी दुवैलाई आफ्नो कब्जामा लिएर यूवतीका आफन्तहरुसँग सम्पर्क गर्नुभएको थियो ।
यूवतीका आफन्तले दानबहादुरविरुद्ध नेपाल प्रहरीमा उजुरी परिसकेको र प्रहरी खोजीकार्यमा रहेको हुँदा दुवै जनालाइ नेपाल पठाइदिन आग्रह गरेका थिए ।
मूल प्रवाहले उनीहरूलाई मदनराज, रामसिंह विष्ट र मोहन अधिकारीको जिम्मा लगाइ गड्डाचौकी पठाएको थियो । आइतबार उनीहरू दुवै जना नेपाल प्रहरी र आफन्तको सम्पर्कमा पुगिसकेका छन् ।
