रियाद । सउदी अरबले कोरोना महामारी नियन्त्रणका लागि भन्दै छिमेकी मुलुकहरू संयुक्त अरब इमिरेट्स (युएई), इथियोपिया र भियतनामका नागरिकको प्रवेशमा अनिश्चित कालका लागि प्रतिबन्ध लगाएको स्थानीय सञ्चार माध्यमले उल्लेख गरेका छन् ।
सउदी अरबको राज्य सञ्चालित संस्था एसपिएले सरकारी अधिकारीलाई उद्धृत गर्दै भनेको छ– सउदी अरबबाट विदेश जान चाहने आफ्ना नागरिकलाई भने आधिकारिक सरकारी निकायबाट अनुमति पाएपछि मात्र यी देश भ्रमण गर्न पाउने बताइएको छ । नयाँ प्रतिबन्ध आइतबार रातिदेखि लागु हुने छन् ।
विश्व स्वास्थ्य सङ्गठनले मार्च ११, २०२० मा कोभिड–१९ को महामारीको घोषणा गरेको थियो । त्यसपछि विश्वका धेरै देशले कोभिड–१९ नियन्त्रणका लागि भन्दै स्वदेशी तथा विदेशी आवागमनलाई कडा पारेका छन् ।
हालसम्म विश्वभरिका १८ करोड ३० लाख १० हजारभन्दा बढी मानिस कोरोनाबाट सङ्क्रमित भइसकेका जोन्स हप्किन्स विश्वविद्यालयले पुष्टि गरेको छ । यस क्रममा सउदी अरबमा अहिलेसम्म चार लाख ९० हजारभन्दा बढी मानिस कोभिड सङ्क्रमित भएका छन् भने सात हजार ८०० भन्दा बढीको कोभिड सङ्क्रमणपछि मृत्यु भएको छ ।
यसैबिच, संयुक्त अरब इमिरेट्स (युएई) ले परराष्ट्र मन्त्रालय र राष्ट्रिय प्रकोप तथा बिपत् व्यवस्थापन प्राधिकरणले यात्राको मौसम सुरु भएपछि नागरिकले कोभिड–१९ सम्बन्धी सबै सावधानी र रोकथामका उपाय पालना गर्नु आवश्यक रहेको बताएको द एक्सप्रेस ट्रिब्युनले लेखेकोे छ ।
युएईको नागरिक उड्डयन प्राधिकरणले एक सूचनामार्फत् लाइबेरिया, नामिबिया, सियरालियोन, प्रजातान्त्रिक गणतन्त्र कङ्गोे, युगान्डा, जाम्बिया, भियतनाम, भारत, बङ्गलादेश, श्रीलङ्का, नाइजेरिया र दक्षिण अफ्रिका तथा नेपालबाट हुने उडान जुलाई २१ को राति १२ बजेसम्मका लागि हवाइ यात्रामा प्रतिबन्ध लगाइएको जानकारी गराइएको हो । यो प्रतिबन्ध कार्गो उडान, व्यापारिक तथा चार्टर उडानहरूलाई बाध्यकारी नहुने बताइएको छ ।
युएईका अधिकारीले युएईका नागरिकलाई उनीहरूको यात्राको क्रममा कोभिड–१९ सङ्क्रमण पुष्टि भएमा देशले लागु गरेको सबै निर्देशन तथा स्वास्थ्य नियमको पालना सुनिश्चित गर्नका लागि अलग्गै बस्नुपर्ने बताएका छन् । (रासस/एएनआई)
