खिमराज चालिसे, चंडिगढ (भारत)।
राष्ट्रिय जनमोर्चाका अध्यक्ष चित्रबहादुर केसीले गणतन्त्र, धर्म निरपेक्षता तथा सिमित लोकतान्त्रिक व्यवस्थालाई समेत सिध्याउने खेल भइरहेको बताउनुभएको छ । सिमित प्रकारको बहुदलीय संसदीय व्यवस्थामा समेत कालो बादल मडारिएको केसीले बताउनुभयो ।
मूलप्रवाह अखिल भारत नेपाली एकता समाजद्वारा जनजाति, समता र रक्तिम विभागको आनलाइनमा प्रशिक्षण कार्यक्रमलाई सम्वोधन गर्दै अध्यक्ष बेसीले देशलाई सिक्किमीकरण गर्ने प्रयास भइरहेको बताउनुभएको छ ।
उहाँले संसदीय व्यवस्थामाथि कालो बादल मडारिइ रहेको र राष्ट्रियता खतरामा रहेको भन्दै नागरिकता ऐनले झन् ठुलो खतरा निम्ताइ रहेको बताउनुभयो ।
रणनीतिक रुपमा संसदीय व्यवस्थालाई सही नभए पनि २०६२/०६३ सालको जनआन्दोलनबाट प्राप्त उपलब्धि गुम्ने अवस्थामा त्यसको संरक्षण गर्नुपर्ने र थप उपलब्धिका लागि संघर्ष गर्नुपर्ने बताउनुभयो । उहाँले ओलीलाई प्रयोग गरेर साम्राज्यवादीहरुले देशको राष्ट्रियतामाथि नै धावा बोलिरहेको तर्फ नेपाली जनता सजग हुनुपर्ने बताउनुभयो ।
कार्यक्रममा नेकपा (मसाल) का प्रवक्ता रामप्रकाश पुरीले वर्गसंघर्ष र साँस्कृतिक आन्दोलनबारे प्रशिक्षण दिनुभएको थियो । यस्तै, जातीय समता समाजका अध्यक्ष राजेश विश्वकर्माले दलित समस्याको संघर्ष र विरोधलाई वर्गीय संघर्षसँग जोड्नुपर्ने बताउनु भयो । अखिल नेपाल जनजाति सम्मेलन का अध्यक्ष निम बहादुर बुढाले जातीय हक हितको संरक्षण वर्तमान राज्य व्यवस्थाबाट हुन नसक्ने धारणा व्यक्त गर्नुभएको थियो ।
कार्यक्रममा मूल प्रवाह अखिल भारत नेपाली एकता समाजका केन्द्रीय अध्यक्ष दुर्गा बहादुर केसी, महासचिव ठाकुर खनाल, नेपाली समाचारका सहसम्पादक धनवीर पुनको पनि आथित्यता रहेको थियो ।
कार्यक्रम खिमबहादुर बिकको सञ्चालनमा तथा कूल बहादुर बगालेको अध्यक्षतामा सम्पन्न भएको थियो । मोहराज चालिसेले स्वागत मन्तब्य व्यक्त गर्नुभएको सो कार्यक्रमको अन्त्यमा सहभागीहरुले राखेका जिज्ञासालाई नेताहरुले सम्बोधन गर्नुभएको थियो ।
