काठमाडौँ । विपक्षी गठबन्धनका पाँच राजनीतिक दलले प्राकृतिक विपत्तिको सामना गर्ने कुनै पूर्वतयारी नगरी सरकार गैरजिम्मेवार बनेको आरोप लगाएका छन् ।
हाल कोरोना महामारीसँगै देशका विभिन्न स्थानमा प्राकृतिक प्रकोपले जनजीवन कष्टकर बनिरहेको भन्दै पाँच दलले सरकार गैरजिम्मेवार बनेको बताएका हुन् ।
२०७८ असार ३ गते संयुक्त विज्ञप्ति प्रकाशित गरी विपक्षी दलहरूले बाढीपहिरो प्रभावित जनताको उद्धार तथा राहत प्रभावकारी बनाउन सरकारसँग माग गरेका छन् । साथै, दलहरूले उद्धार र राहतमा लाग्न आआफ्नो पार्टीपङ्क्तिलाई निर्देशनसमेत दिएका छन् ।
विज्ञप्तिमा नेपाली काङ्ग्रेसका सभापति शेरबहादुर देउवा, नेकपा (माओवादी–केन्द्र) का अध्यक्ष पुष्पकमल दाहाल, नेकपा (एमाले) का वरिष्ठ नेता माधवकुमार नेपाल, जनता–समाजवादी पार्टीका अध्यक्ष उपेन्द्र यादव र राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेलको हस्ताक्षर रहेको छ ।
यस्तो छ, संयुक्त प्रेस वक्तव्य
“मनसुन वर्षाको आरम्भमा नै देशका अधिकांश जिल्लामा बाढी र पहिरोको प्रकोप देखिएको छ । यसको कारण कतिपय मानिसको ज्यान गएको छ भने अर्बांै रुपियाँबराबर भौतिक संरचना, अन्नबाली र पशुचौपाया नष्ट भएका छन् । फलस्वरूप कोरोना महामारीबाट आक्रान्त जनजीवन झनै कष्टकर बनेको छ । बाढी र पहिरोमा परी ज्यान गुमाउनेप्रति श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना प्रकट गर्दछौँ । सरकार उक्त प्रकारको प्राकृतिक विपत्तिको सामना गर्ने कुनै पूर्वतयारी नगरी गैरजिम्मेवार रहेको देखिएको छ ।
बाढीपहिरो र डुबानबाट जनताको सुरक्षा गर्न, पीडित जनता र विस्थापितका लागि तत्काल आवास, खाद्यान्न, मृतकका परिवारलाई सहयोग, घाइतेको उपचारलगायतका उद्धार र राहतका काम प्रभावकारी रूपमा अगाडि बढाउन हामी नेपाल सरकारसँग माग गर्दछौँ । इमान्दारी, तदारुकता र पारदर्शी रूपमा राज्यका सम्बन्धित सबै निकाय तथा साधन र स्रोतको पूर्ण परिचालन गरी बिपत् व्यवस्थापनको कार्यलाई अघि बढाउन आग्रह गर्दछौँ । यस्तो गम्भीर प्राकृतिक विपत्तिको समयमा उद्धार र राहतका क्रियाकलापमा आआफ्नो स्थानबाट योगदान गरी पीडित जनसमुदायलाई सहयोग पु¥याउन सम्पूर्ण पार्टी कार्यकर्ता तथा सङ्घसंस्थालाई हामी हार्दिक आह्वान गर्दछौँ ।”
