काठमाडौँ । श्रम आप्रवासनका क्षेत्रमा क्रियाशील सञ्चारकर्मीलाई प्रोत्साहन गर्ने उद्देश्यले श्रम रोजगार पत्रकार समूहले “श्रम रोजगार पत्रकारिता पुरस्कार” स्थापना गरेको छ । अन्तर्राष्ट्रिय श्रम सङ्गठन (आइएलओ) को साझेदारीमा पुरस्कार स्थापना गरिएको समूहका अध्यक्ष सुनिल न्यौपानेले जानकारी दिनुभयो ।

२०७७ पुस १७ देखि यही असार ३० गतेसम्म प्रकाशित, प्रसारित समाचार सामग्रीमध्येबाट उत्कृष्ट तीन वटा सामग्रीलाई पुरस्कृत गरिने उहाँले बताउनुभयो । प्रथम पुरस्कारस्वरूप नगद रु ३० हजार तथा प्रमाणपत्र, दोश्रो हुनेलाई नगद रु २० हजारसहित प्रमाणपत्र तथा तेश्रो हुनेलाई नगद रु १० हजारसहित प्रमाणपत्र प्रदान गरिने समूहले जनाएको छ ।

सो प्रतिस्पर्धामा सहभागी हुन इच्छुक श्रम रोजगार विधामा क्रियाशील सञ्चारकर्मीले तोकिएको समयभित्र कुनै पनि सार्वजनिक सञ्चार माध्यम (पत्रिपत्रिका, अनलाइन, रेडियो, टिभी) मा नेपाली वा अङ्ग्रेजी भाषामा प्रकाशित वा प्रसारित सामग्री समूहको ललितपुर महानगरपालिका–१० स्थित कार्यालय र समूहको इमेल lejog2076@gmail.com मा पठाउनुपर्ने छ । उक्त सामग्री यही असार ३१ गते अपराह्न ५ बजेभित्र पठाइसक्नुपर्ने समूहले जनाएको छ । तोकिएको समयावधिपश्चात प्राप्त हुने आवेदनलाई मान्यता नदिइने जनाइएको छ ।

पुरस्कारका लागि प्राप्त सामग्रीको मूल्याङ्कनका लागि तीन सदस्यीय एक छुट्टै स्वतन्त्र निर्णयक समिति गठन गरिने र सो समितिमा श्रम आप्रवासनसम्बन्धी विज्ञ, वरिष्ठ सञ्चारकर्मीलगायत संलग्न रहने अध्यक्ष न्यौपानेले जानकारी दिनुभयो ।

नेपाल वा विश्वको जुनसुकै मुलुकमा कार्यरत नेपाली सञ्चारकर्मी यस प्रतिस्पर्धामा सहभागी हुन सक्ने छन् । पुरस्कारका लागि प्रतिस्पर्धामा संलग्न गरिएको सामग्री मौलिक, खोज तथा अनुसन्धानमूलक, विश्लेषणात्मक र सिर्जनशील ढङ्गबाट प्रस्तुत गरिएको हुनुपर्ने समूहले जनाएको छ ।

वैदेशिक रोजगारको क्षेत्रमा विद्यमान समस्याको गहन विश्लेषण तथा समस्या समाधानको उपायसमेत समेटिएको सामग्रीलाई प्राथमिकता दिइने, यस्ता सामग्री प्राथमिक श्रोतमार्फत सङ्कलन गरिएका सूचना, जानकारीमा आधारित हुनुपर्ने, कुनै प्रकाशित, प्रसारित सामग्रीलाई द्वितीय श्रोतको रूपमा सामग्रीमा प्रयोग गरिएको खण्डमा सोको बारेमा सम्बन्धित सामग्रीमा स्पष्टसँग खुलाइएको हुनुपर्ने मापदण्ड तोकिएको छ ।

उक्त सामग्री नेपालबाट हुने वैदेशिक रोजगारीको विषयमा केन्द्रित हुनुपर्ने छ । सो सामग्रीमा श्रम आप्रवासनको प्रक्रियामा हुने जोखिम र खतरालाई निरुत्साहित गर्ने, न्यायोचित भर्ना प्रक्रिया प्रक्रियाप्रति जागरुकता बढाउने र सुरक्षित श्रम आप्रवासनबाट हुने लाभका विषयवस्तु समेटिएको हुनुपर्ने समूहले जनाएको छ । (रासस)