काठमाडौं । प्रधानमन्त्री निकट व्यवसायी दुर्गा प्रसाईंको झापास्थित मेडिकल कलेजलाई गैरकानुनी रूपमा सम्बन्धन दिन लागेको भन्दै विरोधमा उत्रिएका नागरिक अभियन्ताहरु पक्राउ परेका छन् । शुक्रबार बालुवाटारबाट बृहत् नागरिक आन्दोलनका अभियन्ताहरुलाई प्रहरीले पक्राउ गरेको हो ।
पक्राउ पर्नेमा नारायण वाग्ले, खगेन्द्र संग्रौला, युग पाठक, घिमिरे युवराज, सञ्जीव उप्रेती, अनुभव अजित, सरिता परियार अर्चना थापा, रिता परियार, संगीत श्रोता, अञ्जनबाबु शर्मा, मिर्ग नविनलगायत दर्जन बढी अभियानकर्मी छन् । उनीहरुलाई मालीगाउँस्थित प्रहरी चौकीमा राखिएको अभियान्ताहरुले बताएका छन् ।
विवादित व्यवसायी दुर्गा प्रसाईंको झापास्थित बीएण्डसी मेडिकल कलेजलाई प्रधानमन्त्रीको प्रत्यक्ष संलग्नतामा गैरकानुनी रूपमा सम्बन्धन दिन लागेको भन्दै उनीहरू बालुवाटारमा विरोधमा उत्रिएका थिए । सो विषयमा हिजो पनि मेठमाडौंको माइतीघर मण्डलामा प्रदर्शन भएको थियो ।
वरिष्ठ चिकित्सक डा. गोविन्द केसी समर्थक युवाहरुको समूह ‘सोलिड्यारीटी फर डा. जीकेसी’ ले बिहीबार प्रदर्शन गर्दै ‘ओलीको समाजवाद यती, ओम्नी र मार्सीभात’, ‘ओलीको डर्टीगेम जनतामारी मार्सीप्रेम’, ‘संविधानमाथि केपी ओली, कानुनमाथि दुर्गा प्रसाईं’, ‘चिकित्सा शिक्षा आयोग माथिको हस्तक्षेप बन्द गर’, ‘ओलीको मिसन सिटामोलमा कमिसन’ जस्ता नारा लेखिएका प्लेकार्ड बोकेका थिए।
त्यसक्रममा पनि केही प्रदर्शनकारीलाई प्रहरीले पक्राउ गरेको थियो । वरिष्ठ चिकित्सक डा. केसीले बीएण्डसी मेडिकल कलेजलाई कानुनविपरित सम्बन्धन दिन खोजिएको भन्दै आपत्ति जनाउनुभएको छ ।
