काठमाडौं । गएको जेठ १३ गते बाँकेस्थित नेपालगन्जको भेरी अस्पतालमा स्वास्थ्यकर्मीमाथि भएको आक्रमण तथा अस्पताल तोडफोड घटनाबारे सत्यतथ्य बुझ्न गठित समितिले प्रतिवेदन सार्वजनिक गरेको छ।
उक्त प्रतिवेदनले घटना ‘आवेगमा आएर भएको’ ठहर गरेको छ । प्रतिवेदनमा अस्पतालको आन्तरिक व्यवस्थापनमा सुधार गर्नुपर्नेजस्ता बुँदा पनि समावेश छन्। यस्तै, घटनामा संलग्न व्यक्तिलाई हदैसम्मको कारबाही माग गरिएको बुँदा पनि छ ।
‘यो प्रतिवेदनअनुसार घटना सुनियोजित हो भन्ने देखिएन। बिरामीको मृत्युपछि उनका आफन्त तत्काल आवेगमा आएर डाक्टर र नर्समाथि कुटपिट गरेको भन्ने निष्कर्ष प्रतिवेदनको छ,’ प्रमुख जिल्ला अधिकारी शिवराम गेलालले भन्नुभयो ।
सहायक प्रमुख जिल्ला अधिकारीको नेतृत्वमा छानविन समिति गठन गरिएको थियो । समितिले २५ पृष्ठ लामो प्रतिवेदन दिएको छ। स्वास्थ्य ऐन नै परिमार्जन गर्नुपर्ने र भेरी अस्पतालमा कर्मचारीको पदपूर्ति गरिनु पर्ने कुरासमेत प्रतिवेदनमा अटाएका छन्।
१३ जेठमा दाङको तुल्सीपुर उपमहानगरपालिका– ११ का ५१ वर्षीय कोरोना संक्रमित डिल्लीबहादुर रावतको उपचारको क्रममा मृत्यु भएपछि उनका भाइ मानबहादुरसहितका आफन्तले स्वास्थ्यकर्मीमाथि अस्पतालभित्रै सांघातिक आक्रमण गरेका थिए। नेकपा एमालेका लुम्बिनी प्रदेश कमिटी सदस्य रावत पक्राउ परेका छन् ।
घटनाविरुद्ध अस्पतालका नर्सलगायत स्वास्थ्यकर्मीहरुले प्रदर्शन गरी दोषीलाई हदैसम्म कारबाही गर्नुपर्ने माग गरेका थिए । प्रहरीले घटनालगत्तै तीन जनालाई पक्राउ गरी ज्यान मुद्दा लगाएको छ ।
सार्वजनिक भएको प्रतिवेदनले उल्टै अस्पताल प्रशासनको कमजोरी औंल्याएकोमा स्वास्थ्यकर्मीहरू भने अचम्मित छन् । छानविन समितिकी सदस्य, नेपाल नर्सिङ संघ बाँकेकी अध्यक्ष लक्ष्मी केसीले प्रतिवेदन पीडकलाई बचाउने ढंगले आएको दाबी गर्नुभयो ।
‘मैले घटना सुनियोजित भएको भन्दै प्रतिवेदनमा लेख्नुपर्ने कुरा राखेकी थिएँ । तर, अन्य सदस्यले सुनियोजित नभई आवेगमा आएर भएको अडान लिए,’ उहाँले भन्नुभयो ।
सहायक प्रमुख जिल्ला अधिकारी विष्ट संयोजकत्वको छानविन समितिमा भेरी अस्पताल विकास समितिका सदस्यद्वय कृष्णप्रसाद श्रेष्ठ र धनराम ओली, नेपाल चिकित्सक संघ भेरीका अध्यक्ष डा. विनोद कर्ण, नेपाल नर्सिङ संघ बाँकेकी अध्यक्ष लक्ष्मी केसी, नेपालगन्ज मेडिकल कलेजका उपनिर्देशक डा. रोमन किदवाई, जिल्ला प्रहरी कार्यालय बाँकेका डिएसपी सुभाष खड्का सदस्य छन्।
