काठमाडौं । बम बिस्फोटका घाइतेलाई इटाभट्टामा हालेर हत्या गरेको आरोप लागेका कांग्रेस सांसद मोहम्मद आफ्ताब आलमविरुद्ध आज (सोमबार) जिल्ला अदालत रौतहटमा मुद्दा दायर हुँदैछ । प्रहरीले आलममाथिको अनुसन्धान पुरा गरी सरकारी वकिलमार्फत उनीसहित ११ जना सहयोगी विरुद्ध मुद्दा दायर गर्न लागेको हो ।

आलम, उनका भाइ महताब, मबिन आलम, शेख भदइ, शेख एराज, बद्री सहनीलगायत ११ जनाविरुद्ध सर्वस्वसहित जन्म कैदको माग गर्दै मुद्दा दायर गर्ने तयारी गरिएको रौतहटका सरकारी वकिल खडिन्द्रराज कटुवालले जानकारी दिए। सोमबार मुद्दा दायर भएसँगै मंगलबारदेखि आलमसँग अदालतमा बयान र थुनछेकको बहस सुरु हुनेछ । तत्कालिन प्रहरी महानिरीक्षक ओमविक्रम राणासहित ३५ जना साक्षी राखेर मुद्दा दर्ता गर्ने तयारी प्रहरीले गरेको प्रहरीले जनाएको छ ।

२७ चैत ०६४ मा निर्वाचनलाई लक्षित गरी रौतहटको राजपुरमा बम बनाउने क्रममा विष्फोट हुँदा घाइते भएकालाई आलमले जिउँदै इटाभट्टामा जलाएको आरोप छ। विस्फोटमा घाइते भएका र इँटाभट्टामा जलाइएका ओसी अख्तरका ससुरा समसुल मियाँले घाइतेलाई ट्रयाक्टरमा हालेर प्रहरीकै स्कर्टिङमा इँटा भट्टामा लगेर जिउँदै जलाइएको बयान दिएका छन्।

तत्कालिन समयमा प्रहरीले घटनाको छानबिन कमजोर बनाउन मात्र होइन, अपराध गराउनसमेत भूमिका खेलेको खुलासा प्रहरीका वहालवाला र पूर्व अधिकारीहरुले नै गरेका छन्।

यस्तो थियो आलमले गराएको हत्याकाण्ड
२०६४ साल चैत्र २७ गते बुधबार साँझ साढे ६ बजे रौतहटको राजपुर फरहदवा गाविस वडा नम्बर ४ स्थित शेख सदिकको छोरा मोहम्मद आफताब आलमको काकाको घरमा बम विष्फोटन भएको थियो। अर्को दिन हुने संविधानसभा निर्वाचनलाई लक्षित गरी भारतीय कारिगर सहितले बम बनाँउदा अचानक विस्फोट भएको थियो ।

सो विस्फोटमा जाहेरीवाला नारायणसिंह राजपुतको छोरा वर्ष २२ को पिन्टु भन्ने त्रिलोक प्रताप सिंह तथा रुक्साना खातुनको छोरा वर्ष २२ का वसी अख्तर र अन्य व्यक्तिहरूको समेत मृत्यु भएको थियो । विस्फोटमा घाइते भएकाहरुलाई आलमको समूहले उपचारको साटो बद्री साहनीले सञ्चालन गर्ने इँटाभट्टामा हालेर जलाएका थिए । घटनामा कति जनाको हत्या गरियो हालसम्म खुलेको छैन् । स्थानीय प्रत्यक्षदर्शीका अनुसार कम्तीमा २० भन्दा बढी व्यक्तिको निर्ममतापूर्वक हत्या गरिएको थियो ।

संविधानसभा निर्वाचनमा उम्मेदवार रहेका आलमले चुनाव जित्न र अन्य पार्टीका कार्यकर्ताहरूलाई तर्साउन बम बनाउँदै गर्दा विस्फोट भएको थियो । विस्फोटनबाट शेख इद्रिसको घरको छानो भत्केको थियो । घटना खुल्ने डरले सोही रात विस्फोटमा भत्किएको घरको छानो र पर्खाल समेत लगाइएको थियो ।

सर्वोच्च अदालतका न्यायाधीश सुशीला कार्की र डा. भरतबहादुर कार्कीको संयुक्त इजलासले २०६९ जेठ १६ गते अफताव आलमसहित पाँचजनाविरुद्ध मुद्दा चलाउन आदेश गरेको थियो । यो आदेशपछि अनुसन्धान गर्ने प्रहरी अधिकारी र मुद्दा चलाउने सरकारी वकिलको बदनियत छरपस्ट भएको थियो ।

मुद्दा चलाउने आदेश गर्दै न्यायाधीश सुशीला कार्कीले लेखेकी थिइन्ः प्रहरीमा उजुरी गर्दा समेत मुद्दा नचल्दा पीडित मौलिक हकबाट वञ्चित हुन्छ ।