काठमाडौँ । अखिल नेपाल युवक सङ्घका केन्द्रीय वैकल्पिक सदस्य नरबहादुर विकको निधन भएको छ । कोभिडको उपचारकै क्रममा २०७८ जेठ १६ गते पोखराको फेवासिटी अस्पतालमा उहाँको निधन भएको हो ।
राष्ट्रिय जनमोर्चा तनहुँका अध्यक्ष पुष्पलाल श्रेष्ठले दिनुभएको जानकारीअनुसार विकलाई वैशाख २७ गते ज्वरो आएको थियो । नजिकैको औषधि पसलबाट औषधि सेवन गर्दा पनि स्वास्थ्यमा सुधार नभएपछि जेठ २ गते दमौली अस्पतालमा भर्ना गरिएको थियो । त्यहाँ उहाँको एन्टिजेन परीक्षण गर्दा कोरोना पोजेटिभ देखिएको थियो ।
दमौली अस्पतालमा उपचार गर्दा पनि श्वासप्रश्वाससम्बन्धी समस्या यथावतै रहेपछि उहाँलाई जेठ ६ गते पोखरास्थित फेवासिटी अस्पताल भर्ना गरिएको थियो । त्यहाँ उहाँलाई जेठ १५ गतेसम्म आइसियुमा राखेर उपचार गरिएको थियो । आज बिहान भेन्टिलेटरमा राखेर उपचार गर्दै गर्दा उहाँको निधन भएको हो ।
४० वर्षीय नरबहादुर विक अखिल नेपाल युवक सङ्घको तनहुँ जिल्लाध्यक्ष र राष्ट्रिय जनमोर्चा तनहुँका कोषाध्यक्षसमेत हुनुहुन्थ्यो ।
बागलुङ जैमिनी नगरपालिका छिस्तीबाट बसाइँ सरेर तनहुँको दमौलीमा बस्दै आउनुभएका विकका एक श्रीमती, दुई छोरी र एक छोरा रहेका छन् ।
युवक संघ गण्डकीद्वारा शोकवक्तव्य
यसैबिच, विकको निधनप्रति अखिल नेपाल युवक सङ्घ गण्डकी प्रदेश समितिले शोकवक्तव्य प्रसारित गर्दै मृतकप्रति श्रद्धाञ्जली तथा शोकसन्तप्त परिवारप्रति समवेदना प्रकट गरेको छ ।
समितिका अध्यक्ष विक्रम थापामगर र सचिव सञ्जाल शर्माद्वारा जेठ १६ गते नै जारी शोकवक्तव्यका भनिएको छ– “उहाँको निधनप्रति हाम्रो सङ्गठनले गहिरो दुःख प्रकट गर्दै हार्दिक श्रद्धाञ्जली र परिवारजनमा गहिरो समबेदना प्रकट गर्दछ ।”
वक्तव्यमा अगाडि भनिएको छ– “बागलुङ जैमिनी नगरपालिका–८ छिस्ती क्वादीमा जन्मनुभएका कामरेड नरबहादुर विक मूल प्रवाह अखिल भारत नेपाली एकता समाजमा सङ्गठित हुँदै नेकपा (मसाल) का मातहत सङ्गठनका विभिन्न तहको जिम्मेवारी समाल्दै आउनुभएको थियो । उहाँ अखिल नेपाल युवक सङ्घको वैकल्पिक केन्द्रीय सदस्य, गण्डकी प्रदेश कोषाध्यक्ष र तनहुँ जिल्लाध्यक्ष हुनुहुन्थ्यो । त्यस्तै, राष्ट्रिय जनमोर्चा तनहुँ जिल्लाको कोषाध्यक्ष, जातीय समता समाजको प्रदेश सदस्य तथा तनहुँ जिल्लाध्यक्ष हुनुहुन्थ्यो ।”
